ՀՀ ՊՆ-ն նոր մանրամասներ է հայտնել Տեղի հատվածում ադրբեջանական սադրանքի հետևանքով վիրավորում ստացած զինծառայողների առողջական վիճակի մասին:
«Վիրավորներից երկուսը վիրահատվել են Գորիսում, մյուսին տեղափոխել են «Մուրացան» հոսպիտալ: Ընդունման պահին երկուսի վիճակը գնահատվել է ծանր, մյուսինը` ծայրահեղ ծանր: Հետագա օրերին զինծառայողներից երկուսը տեղափոխվել են հիվանդասենյակներ»,-«Զինուժի» հետ զրույցում ասել է ԿԿԶՀ վերակենդանացման բաժանմունքի պետ Մետքասյա Գրիգորյանը:
Նրա խոսքով` ապրիլի 13-ի դրությամբ միայն զինծառայողներից մեկի վիճակն է ծայրահեղ ծանր գնահատվել:
«Ծայրահեղ ծանր վիճակում գտնվող հիվանդին նորից վիրահատել են»,-ասել է նա` հույս հայտնելով, որ առաջիկայում զինծառայողը ծայրահեղ ծանր վիճակից կանցնի ծանր վիճակի:
Հոսպիտալ են տեղափոխվել վերոնշյալ միջադեպի հետևանքով վիրավորում ստացած նաև այլ զինծառայողներ:
ԿԿԶՀ անթոթային վիրաբուժության բաժանմունքի պետ Արման Հակոբյանի խոսքով` վերջին միջադեպի հետևանքով վիրավորում ստացած զինծառայողների ընդհանուր վիճակը միջին ծանրության է, նրանք գտնվում են հիվանդասենյակներում, ստանում են դեղորայքային բուժում:
«Այս պահին կրկնակի միջամտությունների հարց դեռևս չկա»,-ասել է Արման Հակոբյանը:
ՀՀ ԶՈւ ռազմաբժշկական վարչության պետ Գեղամ Փաշիկյանի խոսքով էլ` ապրիլի 15-ի դրությամբ զինծառայողների ընդհանուր վիճակն արդեն հուսալի է:
«Վիրավորում ստացած բոլոր զինծառայողների առողջական վիճակում դրական դինամիկա է նկատվում: Զինծառայողներից միայն մեկն է այս պահին գտնվում վերակենդանացման բաժանմունքում: Այն զինծառայողը, որի վիճակը գնահատվում էր ծայրահեղ ծանր, կրկնակի վիրահատության է ենթարկվել ու համապատասխան բուժում է ստանում»,-ասել է Գ. Փաշիկյանը:
Հիշեցնենք, որ ապրիլի 11-ին՝ ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։
ՀՀ ԱԳՆ-ն Բաքվի սադրանքը Հայաստանի տարածքային ամբողջականության դեմ ոտնձգություն է որակել։ ՀՀ ՊՆ-ն տեղեկացրել է ապրիլի 11-ի փոխհրաձգության հետևանքով դիրքային կորուստներ չունենալու մասին։
Մանրամասները` տեսանյութում:
