ՀՀ էկոնոմիկայի նախարար Գևորգ Պապոյանը հայտարարել է, որ Ռուսաստանի կողմից սահմանված սահմանափակումների հետ կապված տնտեսական խնդիրները «մեծ հաշվով լուծված են»։
«Մենք որևէ կատաստրոֆիկ վիճակ չունենք։ Ի վերջո, այս պրոցեսի արդյունքում Հայաստանը ու ՀՀ տնտեսությունն ավելի ուժեղացած են դուրս գալու։ Մի այսպիսի բան պիտի լիներ, որ մեր տնտեսությունը դիվերսիֆիկացվեր»,- լրագրողների հետ զրույցում ասել է նա։
Պապոյանը հայտնել է, որ մայիսին տնտեսական ակտիվությունն աճել է 11,7%-ով, իսկ հունվար-մայիս ամիսներին՝ 8%-ով։ Նրա խոսքով՝ աճը պայմանավորված է արդյունաբերությամբ, առևտրով, ծառայություններով և այլ գործոններով։ Նշել է, որ այս թվերը չեն ներառում գյուղատնտեսական ցուցանիշները, որոնք հաշվարկվում են յուրաքանչյուր երեք ամիսը մեկ։
Նշելով արտադրողների կողմից իրենց արտադրանքը Ռուսաստան արտահանելու հետ կապված խնդիրները՝ նախարարն ընդգծել է, որ կառավարությունը տվյալներ չունի ռուսական սահմանափակումների հետևանքով փակված բիզնեսների վերաբերյալ։ Պապոյանը հայտարարել է, որ հուլիսի 2-ին կառավարությունը կընդունի նոր օգնության ծրագիր այն արտադրողների ավելի լայն շրջանակի համար, ովքեր նախկինում չեն օգտվել պետական աջակցության ծրագրերից։
Նա նաև նշել է, որ կառավարության հաջորդ նիստում նախատեսվում է բարձրացնել ծաղկավաճառների փոխհատուցման հարցը։ Նա հավելել է, որ կառավարությունը նախատեսում է աջակցել ծաղկավաճառներին անցումային շրջանում՝ իրենց արտահանումն ընդլայնելու համար:
Նախարարը նաև հերքել է կառավարությանն ուղղված մեղադրանքները՝ հակառուսական տրամադրություններ գեներացնելու վերաբերյալ:
«Ե՞րբ եք տեսել մեզ հակառուսական տրամադրություն գեներացնելիս»,- ասել է նա:
Հարցին, թե ի՞նչ ազդեցություն է ունեցել Ռուսաստանում բենզինի պակասը Հայաստանի վրա, Պապոյանը կարծիք է հայտնել, որ հաշվի առնելով Հայաստանի նոր, դիվերսիֆիկացված շուկան, բացասական ազդեցությունը հնարավորինս նվազագույնի է հասցվում:
Նա նշել է, որ Իրանի ճգնաժամի պայմաններում բենզինի գները Հայաստանում աճել են մոտավորապես 10-20%-ով՝ համեմատած այլ երկրների մոտավորապես կրկնակի աճի հետ: Պապոյանը նաև շեշտել է նոր աղբյուրներից բենզինի մատակարարումները մեծացնելու անհրաժեշտությունը՝ գների բարձրացումից խուսափելու համար:
Այսօր նաև վարչապետ Նիկոլ Փաշինյանը չի համաձայնել այն գնահատականի հետ, որ ռուսական կողմից սահմանված սահմանափակումները պատժամիջոցներ են:
«Պատժամիջոց չկա և չի կարող լինել, այլ թեմա կա, բնականաբար, կքննարկենք»,- ասել է նա՝ անդրադառնալով Եվրասիական տնտեսական միության (ԵԱՏՄ) շրջանակներում օգոստոսին նախատեսված հանդիպմանը:
Փաշինյանը մանրամասնել է, որ այն կանցկացվի անդամ պետությունների վարչապետերի մակարդակով: Նա նշել է, որ նախատեսում է Ռուսաստանի կողմից սահմանված սահմանափակումները քննարկել ՌԴ վարչապետի հետ:
Վարչապետը նաև մեկնաբանել է ՌԴ նախագահ Վլադիմիր Պուտինի հետ հանդիպման հնարավորությունը։ Փաշինյանը նշել է, որ հանդիպում նախատեսված չէ, բայց «առաջիկայում կլինեն շփումներ»։
Հունիսի երկրորդ կեսին հանդիպում անցկացնելու մասին իր խոսքերի վերաբերյալ հարցին պատասխանելով՝ նա նշել է, որ «դա այլ թեմայի մասին էր»։
Մայիսի վերջից և հունիսի սկզբից «Ռոսսելխոզնադզորն» արգելել էր Հայաստանից ծաղիկների, մրգերի, բանջարեղենի և չրերի ներմուծումն ու տարանցումը ՌԴ, ինչպես նաև պահանջել էր կասեցնել ձկնամթերքի և ձկան անասնաբուժական սերտիֆիկատների ձևակերպումը և հայտնել անորակ ալկոհոլային արտադրանքի հայտնաբերման մասին։ Սահմանափակումները կգործեն մինչև հայկական կողմը մշակի անվտանգության ապահովման համապատասխան ընթացակարգ։
Այս ֆոնին Հայաստանի իշխանությունները հունիսի սկզբին հայտարարել էին այլ երկրներ արտահանման հնարավորության և ՌԴ սահմաններից վերադարձվող ապրանքների սուբսիդավորման մասին։ Միաժամանակ, Երևանից ընդգծել էին, որ նպատակ չունեն ռուսական շուկայից արտահանումը վերաուղղել դեպի Եվրոպա։
