ՀՀ ԿԳՄՍ նախարար Ժաննա Անդրեասյանը մեկնաբանել է Սյունիքի մարզի Դավիթ Բեկ գյուղի դպրոցի փակման հարցը։ Դպրոցի փակումից հետո երեխաները տեղափոխվել են Արծվանիկ գյուղի կրթահամալիր։
Անդրեասյանն ընդգծել է, որ մի քանի գյուղի երեխաներին մեկ կրթահամալիրում սպասարկելն ընդունելի է, քանի դեռ կան լավ ճանապարհներ և կազմակերպված դպրոցական տրանսպորտ։
Armenia Today-ի նկարահանող խումբն այցելել էր Դավիթ Բեկ։ Փակված դպրոցի ուսուցիչը հայտնել է, որ երեխաների համար դժվար կլինի դպրոց հասնելը, հատկապես՝ ձմռանը, քանի որ ճանապարհը տևում է մոտ մեկ ժամ։
Նախարարը վստահեցրել է, որ կառավարությունն աշխատում է դպրոցական տրանսպորտի գնման ուղղությամբ։ Անդրեասյանը հավելել է, որ դպրոցական ավտոբուսների ձեռքբերման գործընթացն արդեն սկսվել է, առանց նշելու, թե քանի ավտոբուս են իշխանությունները նախատեսում գնել մարզերի դպրոցների համար։
Անդրեասյանը նշել է, որ «300 դպրոց» ծրագրի շրջանակներում Հայաստանում կառուցվում են ինչպես առանձին դպրոցներ, այնպես էլ մեկից ավելի համայնքների երեխաներին սպասարկելու համար նախատեսված կրթահամալիրներ։ Նա նշել է, որ կառավարությունն այս մոդելը համարում է ընդունելի և արդյունավետ, բայց միայն այն դեպքում, եթե անհրաժեշտ ենթակառուցվածքները լիովին ապահովված լինեն:
Նախարարը մանրամասնել է, որ կրթահամալիրների գործունեության համար անհրաժեշտ է երեք պայման՝ լիովին նորոգված ճանապարհներ, հատուկ այդ նպատակով գնված տրանսպորտային միջոցներ, ինչպես նաև վերապատրաստված վարորդներ և ուղեկցողներ, որոնք պատասխանատու են երեխաների անվտանգության համար:
«Քանի դեռ այս երեք բաղադրիչը մեկում չկա, նման գործընթաց չի կարող իրականացվել։ Եվ սա ես ասում եմ նաև մեր բոլոր այն քաղաքացիների համար, ովքեր գուցե լրացուցիչ պարզաբանման կարիք ունեն։ Կրթահամալիրը կարող է ծառայել շրջակա բնակավայրերին այն պարագայում, երբ այս երեք բաղադրիչն առկա են։ Սա կառավարության քաղաքականությունն է, որն ի սկզբանե հայտարարված էր»,- ընդգծել է Անդրեասյանը:
Անդրադառնալով դպրոցական դասերի ժամը 8:30-ի փոխարեն ժամը 8:15-ին մեկնարկի վերաբերյալ մտահոգություններին՝ նախարարը նշել է, որ նախարարությունն առանձին ուսումնասիրություն չի անցկացրել երթևեկության գերբեռնվածության վերաբերյալ, բայց սովորելու տեսանկյունից առավոտյան ժամերը համարվում են ուսուցման համար ամենաարդյունավետը:
Նրա խոսքով՝ բազմաթիվ ուսումնասիրություններ ցույց են տալիս, որ երեխաները մտավոր ավելի ակտիվ են և թարմ առավոտյան:
«Երեխաների թարմությունը, ինտելեկտուալ ակտիվությունը, ներգրավվածությունը դասապրոցեսին շատ ավելի լավ է: Բազմաթիվ ասացվածքներ ունենք վաղ արթնանալու մասին, և դրանցից ոչ մեկը վատ մեսիջ չի պարունակում»,- ասել է նա:
Դասերի մեկնարկի 15 րոպեով ուշացումը, պնդում է Անդրեասյանը, չպետք է լուրջ դժվարություններ առաջացնի:
Դեկտեմբերին «Մեր ձևով» շարժման համակարգող Նարեկ Կարապետյանը հայտարարել էր, որ Սյունիքի մարզում մոտավորապես 45 դպրոց է փաստացի փակվում: Նա նշել էր, որ դպրոցների միավորումը կարող է արդարացված լինել մեկ համայնքի շրջանակներում, սակայն մի քանի համայնքում դպրոցների փակման և ձմռանը լեռնային ճանապարհներով զգալի հեռավորություններ անցնելու պատճառով իրավիճակն արդեն իսկ կրթական հաստատությունների փաստացի փակման պատճառ է դառնում։
