ԱՄՆ Սենատի զինված ուժերի հանձնաժողովը հավանություն է տվել Ուկրաինային 500 մլն դոլարի անվտանգության օգնության հատկացմանը՝ 2026 ֆինանսական տարվա ազգային պաշտպանության մասին օրենքի նախագծի շրջանակներում, հայտնում է Reuters-ը։
Օրինագիծը ներառում է դրույթ Ուկրաինային անվտանգության աջակցության նախաձեռնությունը մինչև 2028 թվականը երկարացնելու մասին՝ հաստատված ֆինանսավորումը հասցնելով 500 մլն դոլարի՝ 2025 թվականի 300 մլն դոլարի դիմաց: Նախագիծը նաև սահմանափակում է A-10 ինքնաթիռների հատկացում:
Ազգային պաշտպանության թույլտվության մասին օրենքն (NDAA) ամենամյա քաղաքական օրինագիծ է, որը սահմանում է ֆինանսավորման մակարդակները և լիազորություն է տալիս ԱՄՆ զինված ուժերին:
Օրինագիծն օրենսդրական կարգով կքննարկվի առաջիկա ամիսներին: Ներկայացուցիչների ստորին պալատն իր տարբերակում Ուկրաինային աջակցությունը պահպանել է 300 մլն դոլարի սահմանում:
Ռուս-ուկրաինական պատերազմը մեկ օրում ավարտելու մասին խոստում տված ԱՄՆ նախագահ Դոնալդ Թրամփը հուլիսի 5-ին հայտարարել էր, որ չգիտի՝ կհաջողվի՞ արդյոք դադարեցնել ռազմական գործողություններն Ուկրաինայում։
Մայիսի 16-ին Ռուսաստանն ու Ուկրաինան Ստամբուլում անցկացրել էին 2022 թվականից ի վեր առաջին ուղիղ բանակցությունները՝ պայմանավորվելով գերիների փոխանակման և բանակցությունները շարունակելու մասին։ Երկրորդ փուլի արդյունքներով, որը տեղի էր ունեցել հունիսի 2-ին, Մոսկվան և Կիևը պայմանավորվել էին զոհված ուկրաինացի զինվորականների մարմինները հանձնելու, ծանր վիրավորում ստացած զինվորականների և 18-25 տարեկան գերիներին փոխանակելու շուրջ:
