Ռուսաստանի նախագահ Վլադիմիր Պուտինը հայտարարել է, որ պատրաստ է հանդիպել «բոլորի», այդ թվում՝ Ուկրաինայի նախագահ Վլադիմիր Զելենսկու հետ, հայտնել է նա Սանկտ Պետերբուրգի միջազգային տնտեսական համաժողովի շրջանակում միջազգային լրատվական գործակալությունների ղեկավարների հետ հանդիպման ժամանակ, փոխանցում է ՌԲԿ-ն:
«Եթե ուկրաինական պետությունն ինչ-որ մեկին վստահում է բանակցություններ վարելու հարցը, Աստված իրենց հետ, թող լինի Զելենսկին։ Խնդիրը դա չէ, խնդիրն այն է, թե ո՞վ է ստորագրելու փաստաթուղթը։ Կարելի է ինչ ասես ասել ներկայիս իշխանությունների լեգիտիմության մասին՝ որպես քարոզչական գործիք, բայց մեզ համար լուրջ հարցեր լուծելիս կարևորը քարոզչությունը չէ, այլ իրավական բաղադրիչը»,- ավելացրել է Պուտինը։
ՌԴ նախագահը հիշեցրել է, որ ըստ Ուկրաինայի սահմանադրության՝ նախագահն ընտրվում է 5 տարի ժամկետով, իսկ «լիազորությունների երկարացման մեխանիզմ գոյություն չունի նույնիսկ ռազմական դրության պայմաններում»։
Նա հավելել է, որ եթե պետության ղեկավարը լեգիտիմ չէ, ապա «ամբողջ իշխանական համակարգը դառնում է ոչ լեգիտիմ»։
Մայիսի 16-ին Ռուսաստանն ու Ուկրաինան Ստամբուլում անցկացրել էին 2022 թվականից ի վեր առաջին ուղիղ բանակցությունները՝ պայմանավորվելով գերիների փոխանակման և բանակցությունները շարունակելու մասին։ Երկրորդ փուլի արդյունքներով, որը տեղի էր ունեցել հունիսի 2-ին, Մոսկվան և Կիևը պայմանավորվել էին զոհված ուկրաինացի զինվորականների մարմինները հանձնելու, ինչպես նաև ծանր վիրավորում ստացած զինվորականների և 18-25 տարեկան գերիներին փոխանակելու շուրջ:
