Իսրայելը հարվածել է Արաքում (Իրան) գտնվող ծանր ջրի ռեակտորին, Associated Press-ի փոխանցմամբ՝ հինգշաբթի հայտնել է Իրանի պետական հեռուստատեսությունը։ AP-ն նաև հայտնում է, որ Իրանն, իր հերթին, հարվածել է իսրայելական մեծ բուժհաստատության:
Իրանական կողմի հաղորդման մեջ նշվել է, որ Արաքում «որևէ ռադիացիոն վտանգ չկա»։ Օբյեկտը տարհանվել է, և ռեակտորի շրջակայքում գտնվող քաղաքացիական տարածքները չեն վնասվել:
Իսրայելը հինգշաբթի՝ հունիսի 19-ի առավոտյան նախազգուշացրել էր, որ հարվածելու է այդ օբյեկտին և հորդորել էր բնակչությանը հեռանալ տարածքից։
Իրանն, իր հերթին, մոտ 20 հրթիռ է արձակել Իսրայելի ուղղությամբ, հայտնում է ՏԱՍՍ-ը՝ հղում անելով իսրայելական N12 հեռուստաալիքին։ Տեղի բնակիչները տեղեկացրել են բազմաթիվ պայթյունների մասին՝ Թել Ավիվում և ևս մի քանի շրջաններում օդային տագնապի ազդանշանների ֆոնին: Այդ հարվածներից, ըստ Իսրայելի, տուժել է նաև Իսրայելի գլխավոր բժշկական կենտրոններից «Սորակա»-ն:
Այս պահին այլ մանրամասներ հայտնի չեն, չի հաղորդվել նաև զոհերի կամ տուժածների մասին:
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ Պաշտոնական Երևանը դատապարտել էր Իսրայելի հարձակումն Իրանի վրա։ Երկու կողմն էլ հայտնել է զոհերի և բազմաթիվ տուժածների մասին:
