Իսրայելը ՀԱՄԱՍ-ի հետ չի պայմանավորվել ո՛չ հրադադարի, ո՛չ էլ բանտարկյալների ազատ արձակման շուրջ, հայտարարել է երկրի վարչապետ Բենիամին Նեթանյահուն:
Նա ընդգծել է, որ ՀԱՄԱՍ-ի հետ պայմանավորվել են միայն պատանդ, ամերիկացի Իդան Ալեքսանդրին ազատ արձակելու վերաբերյալ։
Նշվում է, որ մայիսի 11-ին Իսրայելը տեղեկացրել էր Ալեքսանդրին ազատելու ՀԱՄԱՍ-ի որոշման մասին։ Խմբավորումն այդ քայլը բացատրել էր որպես բարի կամքի դրսևորում ԱՄՆ նախագահ Դոնալդ Թրամփի նկատմամբ՝ ՀԱՄԱՍ-ի, ԱՄՆ-ի, Եգիպտոսի և Կատարի միջև քառակողմ բանակցություններից հետո: ՀԱՄԱՍ-ը նաև հայտարարել էր, որ Ալեքսանդրը կենդանի մնացած ամերիկացի վերջին պատանդն է։
Այդուհանդերձ, Իսրայելի վարչապետը հայտարարել է, որ Գազայում մնացած 59 պատանդների ազատ արձակման շուրջ բանակցությունները կշարունակվեն կրակի տակ՝ ռազմական գործողությունների ուժեղացման նախապատրաստման ընթացքում։
Հունվարի 15-ին Իսրայելը և ՀԱՄԱՍ-ը փուլային համաձայնության էին եկել Գազայի հատվածում պատերազմը դադարեցնելու վերաբերյալ:
Փետրվարի սկզբին Թրամփը հայտարարել էր, որ ԱՄՆ-ն պատրաստ է ստանձնել Գազայի հատվածի կառավարումը, այդ թվում՝ ականազերծել տարածքը և քանդել ավերված շենքերը:
Մարտի 18-ի լույս 19-ի գիշերն Իսրայելը վերսկսել էր հարվածները Գազայում։ Իսրայելի վարչապետ Բենիամին Նեթանյահուն հայտարարել էր, որ հարձակումները շարունակվել են՝ կապված պաղեստինյան ՀԱՄԱՍ շարժման կողմից հրադադարի ռեժիմի երկարաձգման և պատանդների ազատման ամերիկյան ծրագիրը մերժելու հետ:
«Ալ Ջազիրա» հեռուստաալիքը մայիսի 11-ին գրել էր, որ Պաղեստինյան ՀԱՄԱՍ շարժման ներկայացուցիչները Գազայի հատվածում հրադադարի վերաբերյալ ուղիղ բանակցություններ են վարում ԱՄՆ վարչակազմի հետ։
