Հնդկաստանը գիշերը հրթիռային հարվածներ է հասցրել Պակիստանի կողմից վերահսկվող տարածքներում գտնվող ինը թիրախի ուղղությամբ, կան զոհեր, հաղորդում է BBC-ն:
Հնդկաստանի բանակը հայտարարել է «Սինդուր» գործողության մասին, Պաշտպանության նախարարությունը հավելել է, որ դա պատասխան է «Պակիստանի կողմից իրականացված և նախապատրաստվող ահաբեկչություններին»։
Պակիստանի զինված ուժերը պատասխան հրթիռակոծություն են իրականացրել: Իսլամաբադն, իր հերթին, 26 զոհի մասին է հայտնել: Պակիստանը նաև պնդել է, որ իր բանակը խոցել է հնդկական հինգ կործանիչ։ Հնդկաստանը չի հաստատել այս պնդումը։
Հնդկաստանի՝ սահմանին մոտ գտնվող նահանգներում արտակարգ դրություն է հայտարարվել, փակվել են ուսումնական հաստատությունները, բանակն ու ոստիկանությունը բերվել են բարձր պատրասկանության: Պակիստանը, իր հերթին, 48 ժամով փակել է օդային տարածքը։
Միջուկային ուժ ունեցող երկու հարևան պետությունների միջև լարվածությունը կտրուկ աճել է Հնդկաստանի Փահալգամ նահանգում ապրիլի 23-ի զինված հարձակումից հետո, որի հետևանքով զոհվել էր 26 մարդ:
