Իրանի միջուկային-էներգետիկ ենթակառուցվածքների ռմբակոծման դրսից հնչող սպառնալիքներն անընդունելի են, ասվում է ՌԴ փոխարտգործնախար Սերգեյ Ռյաբկովի և Իրանի ԱԳ նախարարի քաղաքական հարցերով տեղակալ Մաջիդ Թախտ-Ռավանչիի համատեղ հայտարարության մեջ։
«Ընդգծվել է կարգավորման համատեքստում Իրանի հակառակորդների կողմից ռազմաուժային մեթոդների կիրառման անօրինականությունն ու անթույլատրելիությունը և ԻԻՀ միջուկային-էներգետիկ ենթակառուցվածքների ռմբակոծման իրականացման դրսից հնչող սպառնալիքների անընդունելիությունը, որոնք անխուսափելիորեն կհանգեցնեն լայնածավալ և անդառնալի ռադիոլոգիական և հումանիտար հետևանքների ողջ մերձավորարևելյան տարածաշրջանի և ամբողջ աշխարհի համար»,- ասվում է հայտարարության մեջ:
Նշվում է, որ ԱԳՆ ներկայացուցիչների հանդիպման ժամանակ շարունակվել է Իրանի միջուկային ծրագրի շուրջ ստեղծված իրավիճակի առարկայական քննարկումը՝ «շեշտը դնելով արևմտյան երկրների կողմից արհեստականորեն և առանց պատճառի սրվող լարվածության կայունացման և նվազեցման ուղղությամբ հնարավոր համատեղ քայլերի վրա»։
Այսօր ավելի վաղ ԶԼՄ-ները հայտնել էին, որ ԱՄՆ-ն պատրաստվում է արդեն «առաջիկա շաբաթներին» հարվածներ հասցնել Իրանի տարածքում գտնվող միջուկային օբյեկտներին։
Փետրվարին ԱՄՆ նախագահ Դոնալդ Թրամփը հրամանագիր էր ստորագրել Իրանի նկատմամբ առավելագույն ճնշման քաղաքականությունը վերականգնելու մասին։ Ավելի ուշ նա հայտնել էր, որ նամակ է ուղարկել Իրանի գերագույն առաջնորդ Ալի Խամենեիին՝ միջուկային ծրագրի քննարկման առաջարկով։ Խամենեին ասել էր, որ Թեհրանը պատրաստ է պատասխանել ԱՄՆ-ի ցանկացած ագրեսիվ գործողության, ինչպես նաև մերժել էր Վաշինգտոնի հետ բանակցությունների հնարավորությունը։
