ԱՄՆ-ն պատրաստվում է արդեն «առաջիկա շաբաթներին» հարվածներ հասցնել Իրանի տարածքում գտնվող միջուկային օբյեկտներին, գրում է The Daily Mail-ը:
«Դա վաղուց պետք է արվեր։ Ժամանակն է վերջակետ դնել»,- մեջբերում է կայքն Իսրայելի կառավարության բարձրաստիճան աղբյուրին, ըստ որի՝ Իսրայելի ղեկավարությունն ԱՄՆ նախագահ Դոնալդ Թրամփի վերադարձը Սպիտակ տուն համարում է «Իրանի հետ գործ ունենալու լավագույն պահը», և գտնում է, որ նման այլ հնարավորություն այլևս չի ներկայանա:
Իսրայելական ռազմական շրջանակների ներկայացուցիչը պարբերականին հայտնել է, որ հարվածների արդյունքում, որոնք իսրայելական ավիացիան վերջին մեկ տարվա ընթացքում հասցրել է Սիրիայի, Իրանի և Իրաքի տարածքներին, վերացվել են «խոշոր օդային գործողության հիմնական խոչընդոտողները՝ իրանական պրոքսի ՀՕՊ համակարգը»:
Փետրվարին Թրամփը հրամանագիր էր ստորագրել Իրանի նկատմամբ առավելագույն ճնշման քաղաքականությունը վերականգնելու մասին։ Ավելի ուշ նա հայտնել էր, որ նամակ է ուղարկել Իրանի գերագույն առաջնորդ Ալի Խամենեիին՝ միջուկային ծրագրի քննարկման առաջարկով։ Խամենեին ասել էր, որ Թեհրանը պատրաստ է պատասխանել ԱՄՆ-ի ցանկացած ագրեսիվ գործողության, ինչպես նաև մերժել էր Վաշինգտոնի հետ բանակցությունների հնարավորությունը։
