ԱՄՆ-ն դիտարկում է միջուկային անուղղակի բանակցություններ սկսելու Իրանի առաջարկը, գրում է Axios-ը։
«Սպիտակ տունը լրջորեն քննարկում է այդ հարցը՝ միևնույն ժամանակ զգալիորեն ուժեղացնելով ուժերը Մերձավոր Արևելքում, եթե նախագահ Դոնալդ Թրամփը նախընտրի ռազմական հարվածներ հասցնել»,- հայտնում է Axios-ը՝ հղում անելով աղբյուրներին։
Ըստ աղբյուրի՝ Թրամփի վարչակազմը կարծում է, որ ուղիղ բանակցությունները հաջողության ավելի մեծ շանսեր կունենան, սակայն չի բացառում իրանցիների առաջարկած ձևաչափը և չի առարկում, որ օմանցիները ծառայեն որպես միջնորդ, ինչպես նախկինում:
Փետրվարին Թրամփը հրամանագիր էր ստորագրել Իրանի նկատմամբ առավելագույն ճնշման քաղաքականությունը վերականգնելու մասին։ Ավելի ուշ նա հայտնել էր, որ նամակ է ուղարկել Իրանի գերագույն առաջնորդ Ալի Խամենեիին՝ միջուկային ծրագրի քննարկման առաջարկով։ Խամենեին ասել էր, որ Թեհրանը պատրաստ է պատասխանել ԱՄՆ-ի ցանկացած ագրեսիվ գործողության, ինչպես նաև մերժել էր Վաշինգտոնի հետ բանակցությունների հնարավորությունը։
