ԱՄՆ-ն մտահոգություն է հայտնել Թուրքիայում անկայունության կապակցությամբ, հայտարարել է ԱՄՆ պետքարտուղար Մարկո Ռուբիոն:
«Մենք, ինչպես բոլորը, նայում ենք նույն լրատվական ռեպորտաժները, թե ինչ է տեղի ունենում։ Անշուշտ, մտահոգված ենք այդ դժգոհություններով և որոշ ռեպորտաժներով»,- Ռուբիոյի խոսքերն է մեջբերում Reuters գործակալությունը։
Ավելի վաղ Reuters-ը, հղում անելով թուրքական դիվանագիտական աղբյուրին, գրել էր, որ Ռուբիոն երեքշաբթի Վաշինգտոնում Թուրքիայի ԱԳ նախարար Հաքան Ֆիդանի հետ բանակցությունների ժամանակ մտահոգություն չի հայտնել հանրապետությունում բողոքի ակցիաների և ցուցարարների ձերբակալությունների կապակցությամբ:
Ռուբիոյի խոսքով՝ ինքը մտահոգություն է հայտնել Թուրքիայում տիրող իրավիճակի վերաբերյալ անմիջապես Ֆիդանի հետ հանդիպման ժամանակ:
Թուրքիայում բողոքի ցույցերն սկսվել էին, երբ մարտի 19-ին Ստամբուլի քաղաքապետ Էքրեմ Իմամօղլուն ձերբակալվել էր ոստիկանության կողմից՝ հակակոռուպցիոն հետաքննության շրջանակներում, կան հարյուրավոր ձերբակալվածներ: Ըստ ցուցարարների՝ քաղաքական գործչի վերաբերյալ այս և մյուս հետաքննությունները քաղաքական դրդապատճառներ ունեն։ Թուրքիայում հազարավոր մարդիկ դուրս են եկել փողոց՝ պաշտպանելու Իմամօղլուին։ Ոստիկանությունը հատուկ միջոցներ է կիրառել ցուցարարների դեմ։
Թուրքագետ Վարուժան Գեղամյանի կարծիքով՝ Թուրքիայում խորացող ներքաղաքական ճգնաժամը կարող է զգալիորեն թուլացնել Ադրբեջանին և Հայաստանի համար «հնարավորությունների պատուհան» ստեղծել։
Իմամօղլուն Ստամբուլի քաղաքապետի պաշտոնն զբաղեցնում է 2019 թվականից։ Նա համարվում է Թուրքիայի նախագահ Ռեջեփ Թայիփ Էրդողանի գլխավոր քաղաքական հակառակորդը։
