Ռուսաստանն ու ԱՄՆ-ն պայմանավորվել են ռուսական և ուկրաինական օբյեկտների ցանկի շուրջ, որոնք ենթակա են էներգետիկ համակարգի դեմ հարվածների համար ժամանակավոր մորատորիումի, հայտնում է «ՌԻԱ Նովոստի»-ն՝ հղում անելով Կրեմլին։
Ցանկը ներառում է նավթավերամշակման գործարաններ, նավթի և գազի խողովակաշարեր և պահեստարաններ, էլեկտրաէներգիայի արտադրության և փոխանցման ենթակառուցվածքներ, ենթակայաններ, տրանսֆորմատորներ և բաշխիչներ, ատոմակայաններ և հիդրոէլեկտրական ամբարտակներ։
Նշվում է, որ ժամանակավոր մորատորիումն ուժի մեջ է 30 օր՝ սկսած մարտի 18-ից և կարող է երկարաձգվել փոխադարձ համաձայնությամբ։
Կրեմլը և Սպիտակ տունը նաև Սև ծովում նավագնացության վերաբերյալ պայմանավորվածություն էին ձեռք բերել։
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ և ԱՄՆ նախագաների միջև փետրվարի 12-ին կայացած հեռախոսազրույցից հետո։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Մարտի 12-ին ԱՄՆ պետքարտուղար Մարկո Ռուբիոն Ռուսաստանին կոչ էր արել 30-օրյա հրադադար հաստատել Ուկրաինայում։ Մարտի 11-ին Կիևը և Ռուսաստանը համաձայնել էին առաջարկին:
Մարտի 24-ին Էր Ռիադում տեղի էր ունեցել Ռուսաստանի և ԱՄՆ-ի «տեխնիկական թիմերի» փորձագիտական հանդիպումը, որը տևել էր ավելի քան 12 ժամ։ Հանդիպմանը երկու երկրների ներկայացուցիչները, ի թիվս այլ հարցերի, պայմանավորվել էին միջոցներ մշակել՝ արգելելու Ռուսաստանի և Ուկրաինայի էներգետիկ օբյեկտների վրա հարձակումները։
