Ամերիկայի հայկական համագումարի (ԱՀՀ) համանախագահներ Օսկար Թաթոսյանը և Թալին Յակուբյանն ԱՄՆ նախագահ Դոնալդ Թրամփին կոչ են արել օգտագործել բոլոր հնարավոր միջոցները Բաքվում պահվող հայ գերիներին ազատելու համար։
ԱՀՀ-ի զեկույցում նշվում է, որ Թրամփին ուղղված նամակում նրանք անդրադարձել են նախագահի՝ «հալածյալ քրիստոնյաներին պաշտպանելու» և «Հայաստանի և Ադրբեջանի միջև խաղաղության վերականգնման մասին» հայտարարությանը։ ԱՀՀ-ի համանախագահներն ընդգծել են անվտանգության վստահելի երաշխիքների, ինչպես նաև «լուրջ հետևանքների» անհրաժեշտությունը, եթե Ադրբեջանը խախտի խաղաղության պայմանագիրը։
Նրանք նշել են նաև Ադրբեջանի կողմից միջազգային պարտավորությունները բազմաթիվ անգամ չկատարելը, ներառյալ՝ հրադադարի մասին համաձայնագիրը, որը ձեռք էր բերվել Վաշինգտոնում 2020 թվականի աշնանը՝ Թրամփի առաջին ժամկետի ընթացքում։ Նամակի հեղինակները լուրջ մտահոգություն են հայտնել «Հայաստանի տարածքի ռազմավարական շրջաններում» Ադրբեջանի շարունակական ռազմական ներկայության կապակցությամբ՝ նշելով, որ չնայած համաձայնության հասնելու Երևանի պատրաստակամությանը, Ադրբեջանը շարունակում է «անօրինական ցուցադրական դատավարությունները հայ գերիների նկատմամբ»:
Համանախագահներն ընդգծել են, որ Արցախում 120 000 հայերի էթնիկ զտումները մնում են չլուծված հումանիտար ճգնաժամ՝ նշելով արցախահայության իրավունքներին ու կարգավիճակին անդրադառնալու և նրանց վերադարձի հիմնարար իրավունքի երաշխավորման անհրաժեշտությունը։
Այսօր ավելի վաղ Ամերիկայի Հայ դատի հանձնախումբը (ANCA) Հայաստանի և Ադրբեջանի իշխանություններին կոչ էր արել խաղաղության պայմանագիր կնքել առանց միակողմանի զիջումների և երաշխավորել Լեռնային Ղարաբաղից տեղահանված հայերի հայրենիք վերադառնալու իրավունքը։
