Առնվազն երեք մարդ է զոհվել Սիրիայի հարավում գտնվող Լաթաքիա քաղաքում տեղի ունեցած հզոր պայթյունի հետևանքով, հայտնում է ՏԱՍՍ-ը՝ հղում անելով Սիրիա-TV-ին։
Նշվում է, որ Էր-Ռամլ թաղամասի շենքերից մեկը փլուզվել է։ Բնակիչների թվում կան վիրավորներ, նրանց թիվը ճշտվում է։ Պայթյունի պատճառը դեռ հայտնի չէ։
Մարտի 6-ին Սիրիայի արևմուտքում՝ Լաթաքիա, Տարտուս և Հոմս նահանգներում, բախումներ էին սկսվել անվտանգության ուժերի և նախկին նախագահ Բաշար Ասադի կողմնակիցների զինված խմբերի միջև։ Բախումների արդյունքում զոհվել էր ավելի քան 1500 մարդ։
Մարտի 8-ին «Գանձասար»-ը հայտնել էր, որ Լաթաքիայի հայերին հրահանգվել է տներից դուրս չգալ, ավելի ուշ տեղեկացրել Լաթաքիայում կրակոցների հետևանքով երկու հայի զոհվելու մասին։ «Գանձասար»-ի թղթակից Նաիրի Կարապետյանն Armenia Today-ին հայտնել էր, որ զոհված հայերը պատահական էին հայտնվել կրակոցների վայրում։ Կարապետյանի խոսքով՝ Լաթաքիայում շուրջ 650 հայ ընտանիք է ապրում, հայեր են բնակվում նաև ծովեզրյա Տարտուսում և Բանիասում։
