Իրանի իշխանությունները խելամիտ չեն համարում ճնշման պայմաններում ԱՄՆ-ի հետ Թեհրանի միջուկային ծրագրի հարցով բանակցելը, հայտարարել է Իրանի արտգործնախարար Աբբաս Արաղչին։
«Թույլ դիրքերից բանակցելն իրական բանակցություն չէ։ Սա կապիտուլյացիա է։ Մենք երբեք չենք բանակցի նման պայմաններում»,- Արաղչիի խոսքերն է մեջբերում Mehr գործակալությունը։
Արտգործնախարարն ընդգծել է, որ Իրանի ղեկավարությունն արտաքին ուժերին երբեք թույլ չի տա իրենց կամքը պարտադրել։ Նա նշել է, որ Իրանը վստահություն չունի ԱՄՆ-ի հետ բանակցություններում՝ հաշվի առնելով Վաշինգտոնի՝ պայմանավորվածությունները չպահպանելու պատմությունը:
«Իրանը բարեխղճորեն բանակցեց և համաձայնության եկավ, բայց արդյունքը ոչ այլ ինչ էր, քան մյուս կողմի չկատարումը և դուրս գալը»,- ասել է նա՝ նկատի ունենալով Վաշինգտոնի միակողմանի դուրս գալը Թեհրանի և համաշխարհային տերությունների միջև 2015 թվականի միջուկային համաձայնագրից:
Փետրվարի 9-ին ԱՄՆ նախագահ Դոնալդ Թրամփն Իրանի հետ միջուկային գործարք կնքելու ցանկություն էր հայտնել։
Թրամփը փետրվարի 4-ին հրամանագիր էր ստորագրել Իրանի նկատմամբ առավելագույն ճնշման քաղաքականությունը վերսկսելու մասին, այդ թվում՝ իրանական նավթի արտահանման կրճատմանն ուղղված միջոցառումները։ Միաժամանակ՝ նա հայտնել էր բանակցությունների և Թեհրանի հետ «հիանալի գործարք» կնքելու պատրաստակամության մասին։ Իրանի գերագույն առաջնորդ այաթոլլա Ալի Խամենեին հայտարարել էր, որ Իրանը պատրաստ է պատասխանել ԱՄՆ-ի ցանկացած ագրեսիվ գործողության և բացառել էր բանակցությունները։
