Ռուսաստանում ուժի մեջ են մտել միգրացիոն նոր կանոններ. ի՞նչ պետք է իմանալ

Միգրացիոն նոր կանոնակարգերը Ռուսաստանում ուժի մեջ են մտել 2025 թվականի հունվարի 1-ից, հայտնում է «Ռոսմիգրանտ» կայքը։

Այժմ Ռուսաստանի հետ առանց վիզայի ռեժիմ ունեցող երկրների քաղաքացիները կարող են երկրում մնալ տարեկան առավելագույնը 90 օր։ Նախկինում առավելագույն ժամկետը 180 օր էր։ Ռուսաստանում գտնվող այցելուները նոր տարվա սկզբից կկարողանան իրենց անունով գրանցել ոչ ավելի, քան տասը բջջային հեռախոսահամար։

Միաժամանակ՝ խստացվել է գրանցման կարգը. այժմ այն ​​հասանելի է միայն օպերատորների գրասենյակներում՝ անձամբ, անհրաժեշտ կլինի ներկայացնել նաև անձը հաստատող փաստաթուղթ և կենսաչափական տվյալներ։

Հունվարի 25-ից միգրանտների համար կդժվարանա Ռուսաստանում ժամանակավոր կացության իրավունք և պարզեցված ընթացակարգով անձնագրեր ստանալը՝ ՌԴ քաղաքացիների հետ ամուսնության հիման վրա։ Այս ամսվա վերջից այդ տարբերակով անձնագիր ստանալը հասանելի կլինի միայն երեք տարուց ավելի տևած ամուսնության դեպքում։

Փետրվարի 5-ից ուժի մեջ կմտնի նոր կանոնակարգ, ըստ որի՝ Դաշնային սահմանային ծառայությունն իրավունք կունենա ինքնուրույն որոշել՝ թույլ տալ կամ չթույլատրել կոնկրետ օտարերկրացու մուտք գործել Ռուսաստան՝ ելնելով անվտանգության նկատառումներից։

Ռուսաստանի Դաշնային միգրացիոն ծառայության տվյալներով՝ 2024 թվականին միգրանտների հոսքը դեպի Ռուսաստան կտրուկ նվազել է։ 2024 թվականի առաջին 7 ամիսների ընթացքում միջազգային միգրացիայի զուտ ներհոսքը նվազել է մինչև 34,9 հազար՝ 2023 թվականի առաջին 7 ամիսների համեմատ կրճատվելով գրեթե 2,5 անգամ։

2024 թվականի դեկտեմբերի 26-ին ՌԴ ԱԳՆ-ն հայտարարել էր Ռուսաստանում օտարերկրացիների գտնվելու կանոնների փոփոխության մասին։ ՌԴ նախագահ Վլադիմիր Պուտինի դեպտեմբերի 30-ի հրամանագրով՝ Ռուսաստանում անօրինական գտնվող օտարերկրացիները պետք է կարգավորեն իրենց իրավական իրավիճակը կամ ինքնուրույն լքեն երկիրը մինչև 2025 թվականի ապրիլի 30-ը։