Ադրբեջանը դադարեցրել է գազի մատակարարումը Սերբիա, հայտնել է Սերբիայի նախագահ Ալեքսանդր Վուչիչը։ Նրա խոսքով՝ այդ մասին Բաքուն տեղեկացրել է Բելգրադին։
«Մենք ծանուցում ենք ստացել մեր ադրբեջանցի եղբայրներից և ընկերներից, որ անհաղթահարելի դժվարությունների, «Շահ Դենիզ» հանքավայրում առկա խնդիրների պատճառով այսօրվանից չենք կարող հույս դնել օրական 1,7 մլն խմ գազի վրա, որն ստանում ենք։ Նշվում է, որ հստակություն կամ վստահություն չկա, թե որքան ժամանակ կպահանջվի գազի մատակարարման վերականգնման համար»,- Վուչիչի խոսքերն է մեջբերում ՏԱՍՍ-ը:
Գործակալության տվյալներով՝ հունվարի 9-ին Bulgargaz ընկերությունը հայտնել էր Ադրբեջանից Բուլղարիա բնական գազի մատակարարումների ժամանակավոր դադարեցման մասին։ Ընկերության տվյալներով՝ Ադրբեջանի հետ համաձայնագրով գազի մատակարարումների ժամանակավոր դադարեցման մասին ծանուցումն ստացվել է հունվարի 6-ին։
2022 թվականի հուլիսին Ադրբեջանը և Եվրամիությունը փոխըմբռնման հուշագիր էին ստորագրել էներգետիկ ոլորտում ռազմավարական համագործակցության վերաբերյալ։ 2022 թվականի հոկտեմբերին Ադրբեջանի նախագահը հայտարարել էր, որ Բաքուն մտադիր է մինչև 2027 թվականը կրկնապատկել գազի մատակարարումները Եվրոպա՝ հասցնելով 18 միլիարդ խորանարդ մետրի։
