Թեհրանը Վաշինգտոնին է ներկայացրել ԱՄՆ-ի հետ հակամարտությունն ավարտելու եռափուլ ծրագիր, հայտնել է Al Jazeera-ն։
Ըստ գործակալության՝ առաջարկը նախատեսում է անցում զինադադարից դեպի Մերձավոր Արևելքում երկարաժամկետ կարգավորման:
Առաջին փուլում կողմերը պետք է մոտ 30 օրվա ընթացքում գործող զինադադարը վերածեն մշտական խաղաղության: Այս փուլը ներառում է Հորմուզի նեղուցում նավագնացության աստիճանական վերականգնում, ԱՄՆ-ի կողմից ծովային շրջափակման վերացում և չհարձակման մասին փոխադարձ պարտավորություն, որը տարածվում է նաև Իսրայելի վրա:
Երկրորդ փուլում Իրանն առաջարկում է սկսել միջուկային գործարքի քննարկում: Նախատեսվում է մինչև 15 տարի ժամկետով սառեցնել ուրանի հարստացումը՝ հետագայում մակարդակը սահմանափակելով մինչև 3,6%՝ համաձայն «զրոյական պահպանման սկզբունքի»: Միջուկային ենթակառուցվածքների ապամոնտաժում չի նախատեսվում, իսկ պատժամիջոցները պետք է հանվեն փուլ առ փուլ:
Երրորդ՝ երկարաժամկետ փուլը ենթադրում է Մերձավոր Արևելքում անվտանգության հարցերով բանակցությունների մեկնարկ ավելի լայն ձևաչափով:
Ըստ ՌԲԿ-ի՝ Իրանի Իսլամական հեղափոխության պահապանների կորպուսի (ԻՀՊԿ) հետախուզությունը հայտարարել է, որ ԱՄՆ նախագահ Դոնալդ Թրամփն ունի երկու ընտրություն՝ ռազմական գործողություն, որի նպատակները չեն իրագործվի, կամ «վատ գործարք» Իրանի հետ:
Մայիսի 2-ին Իրանը հնարավոր էր համարել ԱՄՆ-ի հետ մարտական գործողությունների վերսկսումը, քանի որ խաղաղության բանակցությունները հայտնվել են փակուղում: Թեհրանում ընդգծել են, որ Վաշինգտոնը չի կատարում իր խոստումները, իսկ ամերիկացի պաշտոնյաների գործողություններն ու հայտարարություններն ուղղված են բացառապես նավթի գների անկումը կանխելուն:
Միևնույն ժամանակ՝ CBS News-ը հայտնել է, որ Իրանի հետ հակամարտության կարգավորման ԱՄՆ բանակցային խմբին է միացել Պետդեպարտամենտի նախկին լոբբիստ Նիկ Ստյուարտը, ով նախկինում զբաղվել է Իրանի և Ռուսաստանի դեմ պատժամիջոցների հարցերով:
Թեհրանի և Վաշինգտոնի միջև բանակցությունների վերջին փուլը տեղի էր ունեցել ապրիլի 11-12-ին՝ Իսլամաբադում: Կողմերին չէր հաջողվել համաձայնեցնել կարգավորման պայմաններն Իրանի միջուկային ծրագրի շուրջ առկա սկզբունքային տարաձայնությունների պատճառով, որից հետո ԱՄՆ-ն հայտարարել էր Հորմուզի նեղուցում իրանական նավթի հետ կապված տանկերների շրջափակման մասին:
Իր հերթին՝ Թրամփը սպառնացել է գրավել Կուբան ընդամենը մեկ ավիակիրով՝ «Իրանից վերադարձի ճանապարհին»:
