«Ռոմայի» լեգենդ Ֆրանչեսկո Տոտտին հայտարարել է, որ Չեմպիոնների լիգայի խաղարկության եզրափակչում երկրպագելու է «Ինտերին», տեղեկացնում է Euro-football.ru-ն։
«Իհարկե, Չեմպիոնների լիգայի եզրափակչում կերկրպագեմ իտալական ակումբին։ Հուսով եմ՝ նրանք կկարողանան Չեմպիոնների լիգայի պատվավոր գավաթը վերադարձնել Իտալիա»,- ասել է Տոտտին։
Համաշխարհային ֆուտբոլային լեգենդն իր կարիերայի ընթացքում երբեք չի խաղացել Չեմպիոնների լիգայի խաղարկության եզրափակչում։ Հայաստանի ֆուտբոլի ազգային հավաքականի նախկին ավագ, «Ինտերի» կիսապաշտպան Հենրիխ Մխիթարյանը Չեմպիոնների լիգայի եզրափակչում կխաղա երկրորդ անգամ։
«Ինտերը» դուրս է եկել եզրափակիչ, որում ուժերը կչափի ֆրանսիական ՊՍԺ-ի հետ։ Եզրափակիչը կկայանա մայիսի 31-ին՝ Մյունխենում։
Մայիսի 7-ին Մխիթարյանը հայտարարել էր, որ Իտալիայի սիրտը զարկում է սև ու կապույտ գույներով և հաղթանակի հույս էր հայտնել։
