Arca վճարային համակարգում խափանման պատճառները կապ չունեն կիբեռհարձակումների կամ տեղեկատվական անվտանգության խախտումների հետ, ասված է ընկերության պարզաբանման մեջ:
«Խափանումների որևէ փուլում տվյալների կորուստ կամ արտահոսք չի արձանագրվել»,- վստահեցրել են «Արմենիան Քարդ» ընկերությունից։
Հուլիսի 23-ի ժամը 10։05-16։50-ն ընկած ժամանակահատվածում արձանագրված խափանումը, ըստ Arca-ի, առաջացել էր հավաստագրման համակարգի թարմացման տեղադրումից որոշ ժամանակ անց և պայմանավորված էր տեխնիկական բնույթի խոչընդոտներով:
2025թ․ հուլիսի 29-ին ժամը 11:46-ից մինչև 15։25-ը ևս արձանագրվել էր խափանում նույն պատճառով, որը ժամանակավորապես ազդել էր ընկերության կողմից մատուցվող բոլոր տեսակի ծառայությունների հասանելիության վրա։ Խնդիրը վերացվել էր նույն օրը՝ ընկերության և մատակարար կազմակերպության մասնագետների ներգրավմամբ իրականացված շտապ գործողությունների արդյունքում։
«Խափանման պատճառների խորքային պարզաբանման և նմանատիպ դեպքերի կանխարգելման նպատակով մեկնարկել է համապարփակ տեխնիկական ուսումնասիրություն»,- նշված է հաղորդագրության մեջ։
«Արմենիան Քարդ» ընկերությունը ՀՀ առևտրային բանկերի միասնական քարտային պրոցեսինգային ծառայությունների օպերատորն է:
Ընկերությունից հավելել են, որ որպես կանխարգելիչ միջոցառում՝ ընթացիկ տարում ավարտում են տվյալների երկրորդ կենտրոնի լիարժեք գործարկման գործընթացը։ Նշվում է, որ ընկերության հիմնական ծառայությունների մի մասն արդեն իսկ տեղափոխվել և ակտիվորեն աշխատում է երկրորդ տվյալների կենտրոնում։ Տեխնիկական հագեցման և ամբողջական կարգաբերման գործընթացը նախատեսվում է ավարտել մինչև 2025 թվականի ավարտը:
«Բոլոր շահագրգիռ կողմերին, այդ թվում՝ ՀՀ Կենտրոնական բանկին, համակարգի անդամ առևտրային բանկերին և միջազգային վճարային համակարգերին, տեղեկատվություն է տրամադրվել ինչպես խափանման ընթացքում, այնպես էլ դրա վերացումից անմիջապես հետո՝ սահմանված համապատասխան հաղորդակցման ուղիներով»,- հավաստիացրել են Arca-ից:
