ՀՀ սահմանադրական կարգի մասին խոսելիս այսօր ԱԺ-ում միջադեպ է գրանցվել ՀՀ արդարադատության նախարար Սրբուհի Գալյանի և լրագրողների միջև։ Գալյանին դուր չի եկել, որ լրագրողները նրան շարունակ ընդհատում են։
«Ես հիմա փոքրիկ դասախոսություն պետք է անցկացնեմ՝ սահմանադրական կարգի տապալում հասկացության հետ կապված, ինձ չեք ընդհատելու»,- ասաց Գալյանը։
Ի պատասխան՝ լրագրողները նշեցին, որ իրենք լսարանում չեն և նախարարն էլ դասախոս չէ։ Գալյանն ընդգծեց, որ լրագրողների «անհարգալից պահվածքի պատճառով մեմերի կերպար է դառնում»։
«Եթե դուք ինձ հարցազրույցի եք հրավիրում, բարի եղեք՝ լսեք»,- ասաց նա։
Հարցին, թե պետությունը եկեղեցու գործերին միջամտելու իրավունք ունի՞ Գալյանը պատասխանեց՝ «Եկեղեցու գործերին միջամտելու իրանվունք ո՞վ ունի»։
Հարցի պատասխանը, սակայն, անավարտ մնաց, հերթական միջամտության ժամանակ Գալյանն ընդհատեց հարցազրույցն ու հեռացավ։
Միջադեպից հետո ՀՀ արդարադատության նախարարի մամուլի քարտուղար Մարիամ Մելքումյանը Ֆեյսբուքի իր էջում գրել է, որ լրատվամիջոցների հետ համագործակցությունն Արդարադատության նախարարության առանցքային առաջնահերթություններից է, սակայն Ազգային ժողովում տեղի ունեցած լարվածությունը խոչընդոտել է բնական և կառուցողական հաղորդակցությանը։
«Նախարարությունը վստահ է, որ պետական մարմինների և լրատվամիջոցների համագործակցությունն առավել արդյունավետ է, երբ հիմնված է փոխադարձ հարգանքի և լսելու պատրաստակամության վրա։ Նախարարությունը բաց է երկխոսության համար և պատրաստ է ապահովել անհրաժեշտ ձևաչափեր՝ գործընկերային մթնոլորտի և արդյունավետ հաղորդակցության շարունակականության համար»,- գրել է խոսնակը։
Մայիսի 29-ին ՀՀ վարչապետ Նիկոլ Փաշինյանըհայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներովանդրադարձել էր հոգևորականներին ունշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներինմեղադրել էր այլասերվածության մեջ։
Հունիսի 2-ին Փաշինյանըհայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդըկոչ էր արել կասեցնել «վարչապետի անօրինական և անհեռատես քաղաքականությունը»։ Հունիսի 9-ին վարչապետը կոչ էր արել համախմբվել նոր կաթողիկոսի ընտրության շուրջ՝ պնդելով, որ Գարեգին Երկրորդը զավակ ունի: Հունիսի 10-ի վաղ առավոտյան Փաշինյանն առաջարկել էր ստեղծել համակարգող խումբ՝ Սուրբ Էջմիածնի Վեհարանն ազատելու և կաթողիկոսական նոր ընտրությունների օրակարգի կազմակերպչական հարցերի համար։
Հունիսի 11-ին՝ կեսգիշերն անց, Ամենայն Հայոց կաթողիկոսն ԱՄԷ-ից վերադարձել էր Հայաստան, նրան դիմավորել էին քաղաքացիները: Գարեգին Բ-ն հայտարարել էր՝ վարչապետի հայտարարությունները համընդհանուր վրդովմունք են առաջացրել:
