Ռուսաստանում գործող ավելի քան 10 հայկական կազմակերպություն դատապարտել է վարչապետ Նիկոլ Փաշինյանի հարձակումները Հայ առաքելական եկեղեցու վրա և Ամենայն Հայոց կաթողիկոս Գարեգին Բ-ին պաշտոնանկ անելու նրա մտադրությունը, հայտնում է Սևծովյան-Կասպյան տարածաշրջանի ինստիտուտը։
Մոսկվայի Հայ դատի հանձնախումբը, ՀՅԴ Ռուսաստանի մասնաճյուղը, Ռուս-հայկական կազմակերպությունների համակարգող խորհուրդը և մի շարք այլ կառույցներ Փաշինյանի քաղաքականությունն անվանել են «ապազգային, սրբապիղծ և վիրավորական»՝ հակաեկեղեցական արշավը գնահատելով որպես «նախընտրական հնարք»:
Նրանք ընդգծել են, որ վարչապետը խախտում է ՀՀ սահմանադրությունը, որում ուղղակիորեն նշված է Հայ առաքելական սուրբ եկեղեցու բացառիկ առաքելությունը հայ ժողովրդի հոգևոր կյանքում: Սահմանադրության մեջ նշվում է, որ պետություն-եկեղեցի հարաբերություններին վերաբերող հոդվածների ցանկացած փոփոխություն հնարավոր է միայն հանրաքվեի միջոցով:
«Հայ առաքելական եկեղեցին շարունակում է մնալ Հայաստանում ամենաբարձր վստահությամբ և հեղինակությամբ հաստատությունը։ Ակնհայտ է, որ սեփական ժողովրդի կողմից մերժված» կառավարության գործողությունները նրան ավելի ու ավելի են մղում քաղաքական փակուղու մեջ»,- ասվում է հաղորդագրության մեջ:
Ռուսաստանում գործող հայկական կազմակերպությունները մտահոգիչ են համարել այն, որ եկեղեցու վրա հարձակումները աջակցություն են գտնում Հայաստանին թշնամի երկրներում, առաջին հերթին՝ Թուրքիայում և Ադրբեջանում: Նրանք կոչ են արել Հայաստանի և Սփյուռքի բոլոր ազգային ուժերին, ինչպես նաև հայ ժողովրդի բարեկամներին համախմբվել Հայ առաքելական եկեղեցու շուրջ և միասին պաշտպանել երկիրը:
Հայտարարությունն ստորագրել են «Միասնություն և գթասրտություն» հիմնադրամը, «Ապավեն» միջտարածաշրջանային հասարակական շարժումը, «Համազգային» կրթամշակութային կազմակերպությունը, Հայ առաքելական եկեղեցու Մոսկվայի հայագիտական կենտրոնը, Ռուս-հայկական ռազմավարական և հասարակական նախաձեռնությունների աջակցման կենտրոնը և այլ կազմակերպություններ:
Սվերդլովսկի մարզի հայերը նույնպես դատապարտել են Հայ Առաքելական եկեղեցու նկատմամբ Փաշինյանի թշնամական քաղաքականությունը՝ վարչապետին հիշեցնելով նրա վարած քաղաքականության «ողբալի արդյունքների» մասին:
Բացի դրանից, Ռուսաստանի հայերի միության պատվիրակությունը՝ Արա Աբրահամյանի գլխավորությամբ, հունիսի 10-ին այցելել էր Մոսկվայի Հայ առաքելական եկեղեցու եկեղեցական համալիր և հանդիպել թեմի առաջնորդ Եզրաս Ներսիսյանի հետ՝ աջակցություն հայտնելով եկեղեցուն՝ Էջմիածնի վրա իշխանությունների «աննախադեպ ցինիզմով» հարձակումների ֆոնին: ՌՀՄ-ում նշել են, որ այսօր ՀԱԵ-ն միակ ինստիտուտն է, որն ունակ է համախմբել հայ ժողովրդին և հասարակությանն ազատել բաժանարար գծերից, փոխադարձ ատելությունից և թշնամանքից:
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։ Հունիսի 9-ին վարչապետը կոչ էր արել համախմբվել նոր կաթողիկոսի ընտրության շուրջ՝ պնդելով, որ Գարեգին Երկրորդը զավակ ունի: Հունիսի 10-ի վաղ առավոտյան Փաշինյանն առաջարկել էր ստեղծել համակարգող խումբ՝ Սուրբ Էջմիածնի Վեհարանն ազատելու և կաթողիկոսական նոր ընտրությունների օրակարգի կազմակերպչական հարցերի համար։
