Քասախ և Պռոշյան համայնքների բնակիչները մերժել են Տարածքային կառավարման և ենթակառուցվածքների նախարարության՝ դեպի Երևան ավտոբուսային երթուղին փոխելու առաջարկները և այսօր՝ ապրիլի 22-ի վաղ առավոտյան, փակել Երևան-Աշտարակ մայրուղին։
Ավելի ուշ համայնքի բնակիչները բացել են ճանապարհը՝ պայմանով, որ ՏԿԵ նախարարն այլ նախարարների հետ միասին ապրիլի 25-ին կընդունի իրենց և կքննարկի ստեղծված իրավիճակը։ Մինչ հանդիպումը գործող տրանսպորտը կշարունակի գործել նույնությամբ։
Նախարարությունը համայնքներին առաջարկել էր 50 դրամով նվազեցնել ճանապարհածախսը՝ դարձնելով 200 դրամ Պռոշյանի և 150 դրամ՝ Քասախի համար։ Բացի այդ, նախարարությունն առաջարկել է տրանսպորտին հասանելիություն՝ բնակավայրերին հարող միջպետական ճանապարհից, տրանսպորտային միջոցների թվաքանակի ավելացում, իսկ Երևանում՝ վերջնակետի փոփոխություն։
Այս առաջարկները մերժվելուց հետո նախարարությունն անհնազանդության ակցիան որակել էր «ապակառուցողական»։
«Հնչող պահանջները չեն տեղավորվում գործող օրենսդրության շրջանակներում»,- հավելել էր նախարարությունը։
Ակցիայի համակարգող, Քասախի ավագանու նախկին անդամ Արթուր Մակարյանը հայտարարել է, որ իրենց պահանջը մնում է անփոփոխ։ Նա համոզված է, որ իշխանությունների առաջարկները բացարձակապես չեն համապատասխանում Քասախ և Պռոշյան համայնքների բնակիչների շահերին, որոնց մասին նրանք բազմիցս հայտարարել են հանդիպումների ժամանակ։
«Այո՛, նրանք հանդես են եկել առաջարկներով, իսկ մենք այդ առաջարկներին համաձայնվե՞լ ենք։ Նրանց առաջարկած տարբերակները բացարձակապես չեն բխում Պռոշյան և Քասախ համայնքների բնակչության շահերից, որը մենք բարձրաձայնել ենք հենց հանդիպման ժամանակ։ Այո՛, կարող են առաջարկել շատ բան, բայց այդ առաջարկությունը պետք է բխի ժողովրդի շահերից»,- ասել է Մակարյանը։
Քասախ համայնքի վարչական ղեկավար Արտակ Թովմասյանը հույս է հայտնել, որ կառավարությունը կգնա զիջման։ Նա նշել է, որ առաջարկել է ժամանակավոր լուծում, որը թույլ կտար երկու երթուղիներին էլ գործել, սակայն իշխանությունները չեն ընդունել այդ գաղափարը։
«Ակնկալում եմ, որ կառավարությունը փոխզիջումների կգնա։ Այստեղ ուղղակի սոցիալական խնդիր է, հասկանալի է, մարդիկ սովոր էին տրանսպորտին։ Իմ կողմից առաջարկ ունեմ, որ երկուսն էլ կարելի է սպասարկել ժամանակավոր։ Քննարկման ժամանակ առաջարկել եմ, չի ընդունվել»,- նշել է նա։
Պռոշյան համայնքի բնակիչներից մեկը հայտարարել է, որ իշխանությունները 3 օր ժամանակ ունեն և ինքը համոզված է, որ կլինի դրական պատասխան։
«Մենք մշտապես պետք է պայքարենք, որ մեր տրանսպորտը գործի մշտական, մինչև վերջ։ Ուրիշ պահանջ չունենք, իսկ եթե մեր պահաջը չբավարարեցին, գնալու ենք արդեն նոր պահանջների հետևից»,- նշել է նա։
Ապրիլի 5-ին Պռոշյան և Քասախ համայնքների բնակիչները բողոքի ակցիա էին իրականացրել թիվ 25 և 59 երթուղին սպասարկող ավտոբուսների կրճատման և նոր՝ ավելի թանկ երթուղու դեմ։ Ի նշան բողոքի՝ նրանք ժամանակավորապես փակել էին Երևան-Աշտարակ մայրուղու հատվածը: Ապրիլի 9-ին պռոշյանցիներին ընդունել էին կառավարությունում և ժամանակավոր լուծում տվել իրենց հարցին։ Ապրիլի 10-ին Քասախի բնակիչները փակել էին Երևան-Աշտարակ ավտոճանապարհը՝ պահանջելով չեղարկել դեպի Երևան տրանսպորտի 59 ավտոբուսային երթուղիների կրճատման և տրանսպորտի վարձը բարձրացնելու որոշումները։
