Ապրիլին Հայաստանում կանխատեսվում է կլիմայական նորմայից բարձր ջերմաստիճան՝ 1-2 աստիճանով, հայտարարել է Հիդրոօդերևութաբանության և մոնիթորինգի կենտրոն ՊՈԱԿ-ի տնօրենի տեղակալ Գագիկ Սուրենյանը։
Նա նշել է, որ տեղումների քանակն ապրիլին կլինի նորմայի սահմաններում։
«Մեզ սպասվում է տաք և բավարար տեղումներով ապրիլ։ Այս ամիս հիմնականում գերակշռելու են արևադարձային հոսանքների ներթափանցման պրոցեսները, բայց չի բացառվում, որ ապրիլի վերջին առանձին օրերի ունենանք արկտիկական ցուրտ օդային հոսանքների ներխուժում»,- տեղեկացրել է նա։
Սուրենյանի խոսքով՝ քանի որ ապրիլի տեղումների նորմայի քանակը բավականին բարձր է, իսկ տեղումները նորմայի սահմաններում են, դա նշանակում է, որ ապրիլին կունենանք բավականաչափ շատ տեղումներ։
Նա նշել է, որ արևադարձային հոսանքների ներթափանցման օրերին ցերեկային ժամերին Շիրակում, Արագածոտնի, Վայոց ձորի լեռնային գոտիներում, Գեղարքունիքում օդի ջերմաստիճանը կբարձրանա մինչև 20-23, Լոռիում մինչև 21-25, Տավուշում մինչև 29-31 աստիճան, Արարատում ջերմաստիճանը կտատանվի 26-30 աստիճանի սահմաններում, Սյունիքի հովտային գոտում՝ 28-32, իսկ Սյունիքի նախալեռներում մինչև 21-26 աստիճան տաքություն։
Ինչ վերաբերում է արկտիկական հոսանքների ներթափանցմանը, ապա այդ օրերին, Սուրենյանի խոսքով, Շիրակում, Արագածոտնի, Վայոց ձորի տարածքների լեռնային գոտիներում, Գեղարքունիքում, Սյունիքի լեռնային շրջաններում գիշերը հնարավոր է մինչև -6-ից -10 աստիճան, Լոռիում -2-ից -5, Տավուշում 0-ից -2, Արարատյան դաշտում բացասական ջերմաստիճան չի կանխատեսվում՝ 0-3 աստիճան, Սյունիքի հովտային շրջաններում 2-5, նախալեռնային հատվածներում -2-ից -5, իսկ Երևանում՝ 0-2 աստիճան տաքություն։
