Մինչ ֆուտբոլասերները պահանջում են Հայաստանի ֆուտբոլի ֆեդերացիայի նախագահ Արմեն Մելիքբեկյանի հրաժարականը՝ հայկական ֆուտբոլը «տապալելու համար», նա մտադիր է ամրապնդել իր դիրքերը, գրել է «Հրապարակ»-ը։ Այդ նպատակով Մելիքբեկյանը ցանկանում է ընտրվել ՈւԵՖԱ-ի գործկոմի անդամ և ստանալ տարեկան 200 հազար դոլար աշխատավարձ, հավելվել է պարբերականը։
Թերթը նշել է, որ ՈւԵՖԱ-ի գործադիր կոմիտեն բաղկացած է 7 անձից, այս պահին պաշտոնի համար պայքարում է 10 թեկնածու։ Գործադիր կոմիտեի ընտրությունները տեղի կունենան ապրիլի 3-ին Բելգրադում՝ ՈւԵՖԱ-ի 49-րդ կոնգրեսում։
«Հրապարակը» պնդում է, որ եթե Մելիքբեկյանին հաջողվի ընտրվել այդ պաշտոնում, նա կդառնա հայկական ֆուտբոլի պատմության մեջ առաջին ներկայացուցիչն ՈւԵՖԱ-ում՝ չնայած քննադատությունների ալիքին, որ նա «վնաս է հասցրել հայկական ֆուտբոլին»։
2024 թվականի հոկտեմբերին, ՈՒԵՖԱ-ի Ազգերի լիգայի Հյուսիսային Մակեդոնիայի հետ խաղում Հայաստանի հավաքականի պարտությունից հետո, որին հաջորդել էր հավաքականի գլխավոր մարզիչ Ալեքսանդր Պետրակովի պաշտոնանկությունը, ֆան-շարժումների ներկայացուցիչները պահանջել էին Մելիքբեկյանի հրաժարականը: ՀՖՖ-ն հոկտեմբերի 14-ին հայտարարել էր, որ ՀՖՖ նախագահի հրաժարականի հարց չի քննարկվում: Ինքը՝ Մելիքբեկյանը, հոկտեմբերի 21-ին հայտարարել էր, որ չի պատրաստվում հրաժարական տալ։
Հունվարի 30-ին երկրպագուները ՀՖՖ-ին մեղադրել էին ազգային հավաքականի խաղերին իրենց ներկայությունը կանխելու մեջ։
Փետրվարի 17-ին հայտնի էր դարձել, որ «Այաքսի» և Հունաստանի ազգային հավաքականի նախկին գլխավոր մարզիչ Ջոն վան’տ Սխիպը կգլխավորի Հայաստանի ազգային հավաքականը։
