Մինչ ԱԺ գիտության, կրթության, սպորտի, սփյուռքի ու երիտասարդության հարցերի մշտական հանձնաժողովում քննարկվում է գիտության և կրթության ոլորտի խնդիրները, խորհրդարանի բակում իրենց բողոքի ձայնն են բարձրացրել դիմորդներն ու նրանց ծնողները, պատմում են, որ 15-19 միավոր ստացած մեծ թվով դիմորդներ դուրս են մնացել, այնինչ ավելի ցածր միավորներով շատերն ընդունվել են բուհեր: Պատճառը կառավարության որդեգրած նոր մոտեցումն է՝ փոփոխություն է արվել ընդունելության կարգում․ գերակա է առաջին հայտը, այսինքն՝ թե դիմորդը առաջին տողով որ մասնագիտությունն է ընտրել։
Հիշեցնենք, որ երեկ նրանք ակցիա են կազմակերպել նախ ԳԹԿ-ի դիմաց, ապա դարձյալ ԱԺ-ի մոտ։ Բողոքող դիմորդներն ու նրանց ծնողները նաև նամակ են հանձնել ԱԺ մարդու իրավունքների պաշտպանության մշտական հանձնաժողովի նախագահին։
Դիմորդներից մեկի տեղեկացմամբ՝ պաշտոնական տվյալներով 739 հոգի հավաքել են բավարար գնահատական ու չեն ընդունվել ոչ մի տեղ, ևս 300-400 հոգի ընդունվել են, բայց ոչ այն բաժինները, որտեղ իրենք են ցանկացել:
«Պետք է նախապատվությունը տալ գիտելիքին, ոչ թե հայտին: Ով կարող է բացատրել, թե ինչու պետք է 18,75 բալ ստացածը ոչ մի տեղ չանցնի, իսկ 7,5 բալ ստացողն անցնի: Այստեղ չկա համաչափություն»,-ասաց նա:
Դիմորդները նշում են, որ տեղյակ են եղել, որ գերակայությունը տրվելու է առաջին հայտին, բայց չեն իմացել, որ եթե առաջին հայտով չես անցնում, հնարավոր է 18,75 էլ ստանաս ու ոչ մի տեղ չընդունվես։
Բողոքող ծնողներից մեկն էլ նշեց, որ ԿԳՄՍ նախարար Արայիկ Հարությունյանը կարող էր ընդունել, որ թյուրիմացություն է եղել և կարող էր խնդրին լուծում տալ, սակայն անտարբերություն է դրսևորում: «Դուք փորձում եք արհամարհել 739 հոգուն իրենց ընտանիքներով հանդերձ։ Դա ձեզ մոտ չի ստացվելու, եթե այդպես շարունակեք մեր հաջորդ ակցիան կլինի ձեր հրաժարականի պահանջը։ Մենք պահանջում ենք, որ դու գաք ԱԺ և մասնակցեց այս քննարկմանը, տաք կոնկրետ պատասխան, որոշում»,- ասաց նա՝ ընդգծելով՝ սպասելու ենք այնքան մինչև նախարարը գա: Ոստիկանները հորդորեցին ակցիայի մասնակիցներին հեռանալ ԱԺ-ի դիմացից, ինչին ծնողներն արձագանքեցին, որ պատրաստ են սոցիալական հեռավորություն պահպանել՝ միայն թե իրենց ձայնը հասանելի դառնա։
