ՀՀ քաղաքացիներն արդեն առաջիկա աշնանը կենսաչափական նոր անձնագրեր կունենան։ Անձնագրի նմուշը վարչապետ Նիկոլ Փաշինյանը երեկ ցուցադրել էր ֆեյսբուքյան իր էջում։
Նոր անձնագրի կազմը կարմիր գույնի է։ Արարատ լեռը պատկերված է միայն անձնագրի կազմի դիմերեսին՝ ՀՀ զինանշանի համատեքստում։ Հատկանշական է, որ Խոր Վիրապի պատկերի հետնաֆոնին Արարատ լեռան փոխարեն Արարատյան դաշտավայրն է պատկերված։ Անձնագրի էջերը ձևավորված են ՀՀ մարզերի, Մայր Աթոռի, Գառնու տաճարի, Էրեբունի ամրոցի, այբուբենի, Հայաստանի տեսարժան վայրերի պատկերներով։
Armenia Today-ը քաղաքացիներից հետաքրքրվել է՝ ի՞նչ կարծիք ունեն նոր անձնագրի և դրա ոճային ձևավորման մասին։
Հարցմանը մասնակցած քաղաքացիների մեծամասնությունը դեմ է արտահայտվել Արարատ լեռան պատկերի հետ կատարված փոփոխությանը:
«Շատ վատ եմ վերաբերում, որովհետև մեր լեռն է, ինչո՞ւ են հեռացնում»,- կարծիք է հայտնել քաղաքացիներից մեկը։
Արարատ լեռան պատկերը նոր անձնագրերում ստվերելու հարցում քաղաքացիներից շատերը թաքնված միտում են տեսնում և դրանով պայմանավորված՝ վատ կանխատեսումներ անում ապագայի վերաբերյալ։
«Ուղիղ միտում եմ տեսնում, դա ցուցում է, և գիտակից հայը կզգա»,- երևույթն այսպես է մեկնաբանել մեկ այլ քաղաքացի։
Նոր անձնագրերի ոճային և բովանդակային փոփոխությանը քաղաքացիներից միայն քչերն են դրական կարծիք հայտնել՝ չմանրամասնելով պատճառները։
«Համաձայն եմ, եթե ղեկավարությունը գտնում է, որ դա ճիշտ է, ուրեմն ճիշտ է»,- կառավարության նոր որոշման մասին այսպես է արտահայտվել քաղաքացին։
Հարցվածների թվում էին նաև հայկական սփյուռքի ներկայացուցիչներ, որոնք նշել են խորհրդանշական տեսանկյունից Արարատ լեռան կարևորության մասին։
«Մենք սիրում ենք Արարատը, Արարատը մերն է, ինչո՞ւ են հանում»,- այսպես է արտահայտվել մի իրանահայ։
Որոշ քաղաքացիներ դեռ ամբողջովին չեն հասցրել ծանոթանալ նոր անձնագրերի մասին տեղեկությանը, սակայն դեմ են, քանի որ անիմաստ ֆինանսական ծախս են համարում։
«Նախորդ անձնագրերն էլ վռազ-վռազ հանեցին, ոչ էլ օգտագործում ենք։ Նոր անձնագրերն անիմաստ ծախս եմ համարում»,- ասել է քաղաքացին։
Քաղաքացիների մի մասն էլ չի ցանկացել մեկնաբանել կառավարության նոր որոշումը՝ կա՛մ իրեն իրավասու չհամարելով, կա՛մ պարզապես անիմաստ գտնելով դրան անդրադառնալը։
Դեռևս 2025թ․ կառավարության որոշմամբ ՀՀ մուտքի և ելքի սահմանահատման կնիքի վրայից հանվել էր Արարատ լեռը։
Մանրամասները՝ տեսանյութում
