Բաքվում այսօր ևս մեկ նիստ է տեղի ունեցել Ադրբեջանում պահվող հայ գերիների դեմ «դատավարության» շրջանակներում, հայտնում են տեղական լրատվամիջոցները։
Արցախի նախկին նախագահ Արայիկ Հարությունյանը, նիստի ընթացքում պատասխանելով հարցերին, հայտնել է 2020 թվականի հունիսին Արցախի ղեկավարության և Հայաստանի իշխանությունների հանդիպմանը մասնակցելու մասին:
Ըստ ադրբեջանական լրատվամիջոցների՝ Հարությունյանը հայտարարել է, որ «ցանկացել է բանակցություններ վարել Ադրբեջանի հետ և վերջնական համաձայնության հասնել»:
Ադրբեջանում, պաշտոնական տվյալներով, 23 հայ գերի կա։ 2024-ի դեկտեմբերին Բաքուն դատարան է ուղարկել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին սկսվել են Արցախի առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, պետնախարար Ռուբեն Վարդանյանը, ԱԺ նախագահ Դավիթ Իշխանյանը, արտգործնախարար Դավիթ Բաբայանը, պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Ռուբեն Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
