Ադրբեջանի իշխանությունները պետական մակարդակով շարունակում են աջակցել Հայաստանի դեմ զավթողական ծրագրերի քարոզչությանը նույնիսկ օգոստոսի 8-ի վաշինգտոնյան պայմանավորվածություններից հետո, հայտարարել է ադրբեջանագետ Տաթևիկ Հայրապետյանը:
Նա նշել է, որ Հայաստանի պատմությունը խեղաթյուրող գրքի շնորհանդեսի ժամանակ Ադրբեջանի նախագահ Իլհամ Ալիևի աշխատակազմի սոցիալ-քաղաքական հարցերի վարչության քաղաքական հետազոտությունների 7 վերլուծության բաժնի պետ Ֆուադ Ախունդովն «ափսոսանք» է հայտնել, որ «հայ վանդալները միջազգային հանրությանը ներկայացրել են ժամանակակից Հայաստանի տարածքում գտնվող ադրբեջանական ժողովրդին պատկանող հնագույն բնակավայրերի, ամրոցների, պալատների, քարավանատների, կամուրջների և կրոնական տաճարների մնացորդները՝ որպես հայկական հուշարձաններ»:
Ախունդովը և պատգամավոր Ազեր Ալլահվերենովը հայտարարել են, որ այդ հուշարձաններն իբր ժամանակին չեն ուսումնասիրվել ադրբեջանցի հետազոտողների կողմից, այդ շրջաններում բնակություն հաստատած հայերն օգտվել են իրավիճակից և երկար ժամանակ փորձել են դրանք «հայաֆիկացնել»:
«Այսինքն՝ նախագահի աշխատակազմից մարդ է գնացել, որ ելույթ ունենա ու ցույց տա, որ ՀՀ-ի դեմ զավթողական ծրագիրն ուղղորդվում է անձամբ Ալիևի կողմից»,- ընդգծել է Հայրապետյանը:
Նա հիշեցրել է Ալիևի արտահայտություններն այն մասին, որ Հայաստանի տարածքը «երբեք չի եղել Հայաստան պետություն, իսկ ներկայիս Հայաստանը ադրբեջանցիների հողն է»: Փորձագետի գնահատմամբ՝ նույնիսկ օգոստոսի 8-ի եռակողմ համաձայնագրից հետո Ադրբեջանում հակահայկական քարոզչությունը շարունակվում է ագրեսիվ, միայն ձևականորեն քողարկված, բայց հստակ ինստիտուցիոնալացված ձևով:
Թելման Գասիմովի «Իրևան. յուրաքանչյուր քար պատմություն է» գրքում զետեղվել են հատվածներ Հեյդար և Իլհամ Ալիևների ելույթներից, որոնցում խոսվում է ադրբեջանցիների դեմ հայերի կողմից «էթնիկ զտումների և ցեղասպանության իբր սիստեմատիկ քաղաքականության մասին»։ Գրքի նախաբանում նշվում է, որ «Արևմտյան Ադրբեջանի» թեման ունի ամբողջ ազգը մոբիլիզացնելու ուժ:
Բաքվում վերջին տարիներին բազմիցս հայտարարել են Հայաստան «ադրբեջանցիների վերադարձի» անհրաժեշտության մասին, իսկ 2024 թվականի հոկտեմբերին Ադրբեջանի խորհրդարանում ստեղծվել էր «Արևմտյան Ադրբեջան վերադարձի» խումբ։
Հայկական կողմը բազմիցս հայտարարել է, որ Բաքվի կողմից «Արևմտյան Ադրբեջան» եզրույթի օգտագործումը ոտնձգություն է Հայաստանի տարածքային ամբողջականության նկատմամբ: Հունվարին այս մասին հայտարարել էր ՀՀ վարչապետ Նիկոլ Փաշինյանը, իսկ հունիսին Հայաստանի ԱԳՆ-ն ընդգծել էր, որ «Արևմտյան Ադրբեջան» տերմինը նշանակում է Բաքվի տարածքային նկրտումներ Հայաստանի ինքնիշխան տարածքի նկատմամբ:
