Իրանի Մեջլիսի փոխխոսնակ Ալի Նիկզադը հայտարարել է, որ Իրանի արձագանքը որոշ հարևանների հավակնություններին ուժեղ ու ցավալի է լինելու: Այս մասին հայտնել է IRNA գործակալությունը: Նա նման արձագանք է տվել՝ ի պատասխան Պարսից ծոցի արաբական պետությունների համագործակցության խորհրդի հայտարարությանը, որով կասկածի տակ էր դրվում Պարսից ծոցի Բումուս, Մեծ Թոմբ և Փոքր Թոմբ կղզիների՝ Իրանին պատկանելու հարցը:
Ելույթ ունենալով Իրանի խորհրդարանի նիստում՝ Նիկզադը հայտարարել է, որ բարիդրացիությունն Իրանի արտաքին քաղաքականության մեջ անփոփոխ սկզբունք է համարվում:
«Իրանը փնտրում է տեղեկացված, անվտանգ և տնտեսապես բարգավաճող հարևաններ, սակայն նրա արձագանքը հզոր, ուժեղ և ցավալի է լինելու որոշ հարևանների հավակնությունների նկատմամբ, որոնք պնդումներ են անում սահմանների փոփոխության, ահաբեկչական խմբավորումների տեղակայման կամ իրանական կղզիների վերաբերյալ»,-նշել է նա:
