Նշաձողից ցածր ընկածների հետ ընդունված չէ բանակցել, ուր մնաց թե՝ բանավիճել, 168.am-ի հարցմանն ի պատասխան՝ հայտնել է ՀՀ երրորդ նախագահ Սերժ Սարգսյանի գրասենյակը՝ անդրադառնալով մարտի 26-ին ԱԺ-ում վարչապետ Նիկոլ Փաշինյանի կողմից հնչեցված հայտարարություններին։
«Ճամարտակելու փոխարեն նա միայն մեկ բան կարող է անել՝ հաղթահարել վախերը և հրապարակել ընդհուպ մինչև 2020 թվականի սեպտեմբերի 27-ը բանակցային գործընթացի բոլոր փաստաթղթերը»,- պատասխանել են գրասենյակից:
Պատասխանում նշվել է, որ Փաշինյանի «հոգեկան անհավասարակշիռ վիճակը Հայաստանի և Ադրբեջանի միջև իր իսկ պատճառով հաստատված ռազմաքաղաքական անհավասարակշռության հայելային արտացոլումն է»։
«Դա կապիտուլյանտը չի կարողանում թաքցնել Ալիևի պարտադրած ցածր նշաձողի ծանրության տակ մնացած վախերի պատճառով: Իր աղետալի գործունեությանը տրված բոլոր գնահատականներից՝ ազգային անվտանգության վտանգի աստիճանի հասած նրա հոգեվիճակն ամենաշատը վատթարանում է կապիտուլյանտ բնորոշումից»,- ասվում է հաղորդագրությունում:
Գրասենյակից նշել են նաև, որ Ադրբեջանի հետ հիմա էլ բանակցություններում «կրկնակապիտուլյացիայի ենթարկված անձը խղճուկ կապիտուլյացիայի է ենթարկվել բանականության ու բարոյականության հետ անհավասար պայքարում»:
Մարտի 26-ին Փաշինյանը խորհրդարանում պահանջել էր, որ Հայաստանի երեք նախկին նախագահները կա՛մ ուղիղ եթերում բանավիճեն իր հետ Արցախյան հարցի կարգավորման շուրջ, կա՛մ դադարեցնեն հայտարարություններ անել այս թեմայով։
«Եթե բանավիճում եք, եկեք խոսենք։ Ես ձեզ հետ չեմ բանավիճի, ես ձեզ պատերով կտամ և այնտեղից ձեր քաղաքական դիակի մնացորդները դուրս կհանեն, երեքիդ էլ վերաբերվում է։ Հերիք է ներվերներիս հետ խաղաք։ Ես ձեզ ոտի տակ կտամ, ոչ թե ձեզ հետ կբանավիճեմ»,- ասել էր վարչապետը։
Մարտի 27-ին ՀՀ երեք նախկին նախագահներ Լևոն Տեր-Պետրոսյանի, Ռոբերտ Քոչարյանի և Սերժ Սարգսյանի ներկայացուցիչներն արձագանքել էին Փաշինյանի կողմից հնչեցված հայտարարություններին։
