ՀՀ ԱԳ նախարար Արարատ Միրզոյանը մեկնաբանել է Հնդկաստանի և Պակիստանի միջև սկսված ռազմական գործողությունները: Նա հիշեցրել է, որ երկու երկրների միջև էսկալացիան սկսվել է ահաբեկչությունից հետո, որը Հայաստանը դատապարտել է՝ ցավակցություն հայտնելով:
«Կարծում եմ՝ որևէ իրեն քաղաքակիրթ համարող պետություն չի կարող ողջունել ահաբեկչությունը, կարող է միայն դատապարտել ահաբեկչությունը։ Եվ մենք, կարծում եմ, պետք է ճանաչենք նաև ահաբեկչությունից պաշտպանվելու երկրի իրավունքը։ Այս հարցին այդ պրիզմայով ենք նայում, այդպես ենք ընկալում, և այդպիսին է մեր դիրքորոշումը»,- ասել է Միրզոյանը։
Հնդկաստանի և Պակիստանի միջև հարաբերությունները սրվել էին ապրիլի 22-ին Քաշմիրում տեղի ունեցած ահաբեկչական գործողությունից հետո, որի հետևանքով զոհվել էր 26 մարդ: Հնդկաստանը Պակիստանին մեղադրել էր ահաբեկչությանը մասնակցելու մեջ։ Մայիսի 7-ի Հնդկաստանը հրթիռային հարվածներ էր հասցրել Պակիստանի կողմից վերահսկվող տարածքներում գտնվող ինը թիրախի ուղղությամբ։ Պակիստանի ռազմաօդային ուժերը պատասխան հարվածներ էին հասցրել։
