«Հայաստանի էլեկտրական ցանցեր» ընկերության ժամանակավոր կառավարիչ Ռոմանոս Պետրոսյանը շարունակում է ազատումները և փոփոխությունները ՀԷՑ-ի աշխատակազմում, գրում է «Ժողովուրդ» օրաթերթը:
Նշվում է, որ Պետրոսյանը լծվել է ՀԷՑ-ի աշխատակազմը զտելուն և փոփոխություններ կատարելուն, փակ հանդիպումներ է ունենում ՀԷՑ-ի մարզային մասնաճյուղերում։ Օրերս «Գեղամա» մասնաճյուղում նման մի հանդիպման շրջանակում աշխատակիցներ են ազատվել աշխատանքից։
Այսօր հանդիպում կլինի «Մուսալեռ» մասնաճյուղի տեղակալների, խորհրդականների հետ։ Թերթը չի բացառում, որ այս մասնաճյուղում ևս ազատումներ լինեն, և որ ազատված ինժեներների, տնօրենների և խորհրդականների փոխարեն նշանակվեն ՀԷՑ-ի հետ կապ չունեցող ՔՊ-ականներ։
Հուլիսի 18-ին Պետրոսյանը նշանակվել էր ՀԷՑ ընկերության ժամանակավոր կառավարիչ։ Հուլիսի 24-ին ՀԷՑ-ի մամուլի ծառայությունը հայտարարել էր նոր բարձրաստիճան ղեկավարների նշանակման մասին, նրանց թվում է Գյումրիի ընտրություններում ՔՊ-ի քաղաքապետի թեկնածու Սարիկ Մինասյանը: Հուլիսի 31-ին Պետրոսյանի նախաձեռնությամբ չեղարկվել էր ավելի քան 3 մլրդ դրամ նախահաշվային արժեքով գնման 4 գործընթաց։
