ՀՀ իրավապահների վերջին գործողությունները կապված են ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի՝ Աբու Դաբիում կայացած բանակցությունների և, այսպես կոչված, «Զանգեզուրի միջանցք»-ի շուրջ համաձայնության գալու հետ, գրել է «Հրապարակ»-ը։
Ըստ թերթի՝ խաղաղության պայմանագրի համաձայնեցված կետերից մեկն այն մասին է, որ կողմերը պետք է պայքարեն իրենց պետության ներսում մյուս կողմի նկատմամբ ռևանշիստական հայտարարություններ անող խմբերի դեմ։ Այսպիսով՝ ՀՀ իշխանությունների թիրախում նախ ՀՅԴ-ն է, ապա՝ ՀՀԿ-ն։
«Այսինքն՝ Հայաստանում ընդդիմադիր կուսակցություններ, անհատներ չպետք է լինեն Ալիևին և Ադրբեջանին, նաև՝ Փաշինյանին քննադատող»,- նշել է լրատվականը:
Փաշինյանն ու Ալիևը հուլիսի 10-ին Աբու Դաբիում բանակցություններ էին վարել, որոնք տևել էին ավելի քան 5 ժամ։ Հանդիպումից հետո ՀՀ արտաքին գործերի նախարարությունը հայտնել էր, որ կողմերը համաձայնել են շարունակել երկկողմ բանակցությունները և վստահության ամրապնդման միջոցառումները երկու երկրների միջև: Ադրբեջանական լրատվամիջոցները հաղորդել էին, որ հանդիպմանը քննարկվել է նաև, այսպես կոչված, «Զանգեզուրի միջանցքի» բացման հարցը:
ՀՀ ԱԳ փոխնախարար Մնացական Սաֆարյանը հայտարարել էր, որ Հայաստանի ինքնիշխանության, իրավազորության, տարածքային ամբողջականության մասին սկզբունքների պահպանման դեպքում Հայաստանը դեմ չէ Սյունիքի ճանապարհի արտապատվիրակմանը որևէ երրորդ ընկերության։
