Վենետիկի Մխիթարյան միաբանությունն իր անվերապահ աջակցությունն է հայտնել Հայ Առաքելական եկեղեցուն և Ամենայն Հայոց կաթողիկոս Գարեգին Բ-ին:
Հայտարարության մեջ նշվում է, որ Հայոց Եկեղեցին դարեր շարունակ իր կաթողիկոսների գլխավորությամբ, հայրենասիրական ոգով և ազգանվեր անձնազոհությամբ առաջնորդել է հայ ազգին։
Միաբանությունը շեշտել է, որ Մայր Աթոռ Սուրբ Էջմիածինը աշխարհացրիվ հայությանը ներկայանում է որպես հավատքի օրրան, հույսի փարոս, գոյատևման հենարան և կայունության երաշխիք։
«Մեր մշտամրմունջ աղոթքներով դիմում ենք Ամենափրկիչ Միածնին, հայցելով, որ բարեխոսությամբ չարխափան և միշտ կույս Մարիամ Աստվածածնին, մեր հոր Սուրբ Գրիգոր Լուսավորչին և բոլոր հայրապետներին, և միջնորդությամբ Մխիթար Աբբահոր, անսասան պահի Ամենայն Հայոց Հայրապետական Աթոռը, իր գահակալ Սրբազնագույն Կաթողիկոսը և հայ Ազգը»,- ասվում է հայտարարության մեջ։
Մայիսի 29-ից սկսած վարչապետ Նիկոլ Փաշինյանը սոցիալական ցանցերում հայհոյանքներով լի մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով։ Հունիսի 2-ին նա կասկածի տակ էր դրել Գարեգին Բ-ի կուսակրոնության ուխտի պահպանումը։ Այնուհետ Փաշինյանը հայտարարել էր, թե պատրաստ է Ամենայն Հայոց կաթողիկոս Գարեգին Բ-ին ապացուցել, որ ինքը թլփատված չէ։ Փոխարենը նա Վեհափառին կրկին կոչ էր արել «պատասխանել հարցին՝ խախտե՞լ է արդյոք կուսակրոնության ուխտը, և ունի՞ արդյոք զավակ»։
Հունիսի 25-ին ԱԱԾ-ն խուզարկություններից հետո հեղաշրջման մեղադրանքով 17 անձի նկատմամբ կալանքի միջնորդություն էր ներկայացրել դատարան։ Նրանցից 15-ի նկատմամբ դատարանը կիրառել էր կալանք՝ երկու ամիս ժամկետով։ Կանալավորվածների թվում է «Սրբազան շարժման» առաջնորդ Բագրատ Գալստանյանը։
Հունիսի 27-ին ԱԱԾ-ն մտել էր Մայր Աթոռ Սուրբ Էջմիածին՝ ձերբակալելու Շիրակի թեմի առաջնորդ Միքայել արքեպիսկոպոս Աջապահյանին: Հավաքվածները մի քանի ժամ թույլ չէին տվել տանել սրբազանին, այնուհետև սրբազանն ինքն էր շարժվել դեպի Քննչական կոմիտե: Մի քանի ժամ հարցաքննություննից հետո հունիսի 28-ի վաղ առավոտյան նա կալանավորվել էր:
