Հակաեկեղեցական արշավն ու ընդդիմության դեմ հարձակումը Հայաստանի վարչապետ Նիկոլ Փաշինյանին 2026 թվականի ընտրություններում պարտության կհանգեցնեն, հայտարարել է ՌԴ Պետդումայի ԱՊՀ հարցերով հանձնաժողովի փոխնախագահ Կոնստանտին Զատուլինը:
Այդ գործողությունները, կարծում է Զատուլինը, դուրս են եկել երկրի ներքին գործերի շրջանակներից։ «Եկեղեցու նկատմամբ ճնշումները ու Բագրատ արքեպիսկոպոս Գալստանյանի տանը կատարված խուզարկությունները, ինչպես նաև Սամվել Կարապետյանի և «Սրբազան պայքար» շարժման կողմնակիցների հետապնդումները Փաշինյանի նախապատրաստությունն է ընտրություններին: Նա ցանկանում է կանխարգելիչ հարված հասցնել այն ուժերին, որոնք կարող են իրեն դիմակայել»,- նշել է Զատուլինը։
Փաշինյանը, պատգամավորի խոսքով, խաղադրույք է կատարում Արևմուտքի, Թուրքիայի և Ադրբեջանի աջակցության վրա՝ իշխանության ղեկին մնալու համար: Միաժամանակ, ըստ նրա, եկեղեցու դեմ հալածանքները և հունիսի 20-ին վարչապետի այցը Թուրքիա մեծացրել են հայ հասարակության կասկածները, որ Փաշինյանը կարող է զիջումների գնալ Հայաստանի տարածքով այսպես կոչված «Զանգեզուրի միջանցքի» հետ կապված հարցերում։
Ավելի վաղ՝ հունիսի 24-ին, Զատուլինը հայտարարել էր, որ Փաշինյանը փորձում է երկրի տնտեսական իրավիճակից դժգոհությունն ուղղել գործարար Սամվել Կարապետյանի դեմ, նրան մեղադրել երկրի տնտեսական դժբախտությունների մեջ: Ընդ որում, Զատուլինի կարծիքով, տնտեսական վիճակը, որից դժգոհում են շատ հայեր, հենց Փաշինյանի քաղաքականության արդյունքն է։
