«Քաղաքացիական պայմանագիր» խմբակցությունն ապրիլի 14-ին պետք է քննարկեր ԱԺ պատգամավոր Անդրանիկ Քոչարյանի վարքն ուսումնասիրող էթիկայի ժամանակավոր հանձնաժողով ստեղծելու մասին հարցը, սակայն նա խնդրել է այն հանել օրակարգից, հայտնել է «Ժողովուրդ»-ը՝ հղում անելով իր աղբյուրին։
Ըստ թերթի՝ պատգամավորը խնդրել է հարցը չքննարկել խմբակցության ձևաչափով և խոստացել, որ առաջիկա օրերին այդ մասին կզրուցի վարչապետ Նիկոլ Փաշինյանի հետ։ Նա գործընկերներին ասել է, որ «պետք չէ ընդդիմության բերանը լեզու դնել», և ճիշտ չէ, որ ընդդիմության ներկայացրած առաջարկները խորհրդարանական մեծամասնությունն ընդունի և համաձայնություն տա։
«Նա, ըստ ամենայնի, Փաշինյանին կհամոզի չիրականացնել իր դեմ որևէ քայլ՝ այդպիսով պահպանելով մանդատը, նաև հնարավորություն չտալով խորհրդարանին քննարկել իր հարցը»,- նշել է թերթը։
Ըստ լրատվականի՝ Քոչարյանը շարունակում է իր գործունեությունը խմբակցության թիկունքում, նա վարչապետի հետ զրույցը կվարի իրեն հարմար ուղղությամբ, ինչպես որ ամիսներ առաջ, երբ փորձ էր արվում խմբակցության կողմից բարձրացնել Քոչարյանին մանդատից զրկելու հարցը։
Մարտի 20-ի ճեպազրույցի ժամանակ Քոչարյանը լրագրող Հռիփսիմե Ջեբեջյանից պահանջել էր հեռու կանգնել և «մաքրել շուրթերը»։ Մարտի 26-ին վարչապետ Նիկոլ Փաշինյանին էին փոխանցել պատգամավորական էթիկայի հանձնաժողով ձևավորելու պահանջով նամակ, որը ստորագրել էր 161 լրագրող։ Մարտի 27-ին Հայաստանի ժուռնալիստների միությունը դատապարտել էր Ազգային ժողովում լրագրողների ակցիան բռնությամբ ընդհատելը։
Մամուլը գրել էր, որ լրագրողի նկատմամբ իր կոպիտ վերաբերմունքի քննադատությունից հետո Անդրանիկ Քոչարյանը մեկուսացել է ՔՊ գործընկերներից։
