Ադրբեջանի ԱԳՆ-ն քննադատել է մարտի 18-ին Հայաստանի վարչապետի աշխատակազմի հայտարարությունը և կրկնել Հայաստանի կողմից կրակոցների մասին կեղծ պնդումները, հայտնում են ադրբեջանական լրատվամիջոցները։
Ադրբեջանի ԱԳՆ խոսնակ Այհան Հաջիզադեն հայտարարել է, որ «կայունությունը հնարավոր է միայն այն դեպքում, եթե դադարեցվեն հայկական զինուժի հրետակոծությունն ու սադրանքները»։ Հաջիզադեն նաև նշել է, որ Երևանը «կառուցողական գործողությունների փոխարեն անիրատեսական առաջարկներ է ներկայացնում», որոնք հիշեցնում են «ադրբեջանական տարածքի հայկական օկուպացիան», չնայած այն հանգամանքին, որ մարտի 18-ի կառավարության հայտարարությունը ոչինչ չի պարունակում նախապատրաստվող խաղաղության պայմանագրի շրջանակներից դուրս որևէ բան։
Ադրբեջանի ԱԳՆ-ն կասկած է հայտնել Հայաստանի խաղաղության օրակարգի անկեղծության վերաբերյալ՝ մատնանշելով սահմանամերձ շրջաններում ակտիվ ռազմականացումը։
Ադրբեջանը մարտի 16-ից սկսել էր հայտնել Հայաստանի հետ սահմանին իր դիրքերի ուղղությամբ կրակոցների մասին։ Հայաստանի պաշտպանության նախարարությունը մարտի 16-ին երեք անգամ հերքել էր Բաքվի այս տեղեկությունը։ Նմանատիպ մեկ այլ հրապարակում հերքվել էր մարտի 17-ին, իսկ ուշ երեկոյան Երևանը հերքել էր երկու օրվա ընթացքում Հայաստանից գնդակոծվելու մասին Ադրբեջանի ՊՆ հինգերորդ հաղորդագրությունը։ ՀՀ ՊՆ-ն այսօր արդեն երկրորդ հաղորդագրությունն է հերքում:
Մարտի 17-ի առավոտյան ԵՄ դիտորդական առաքելությունը հայտնել էր Հայաստանի և Ադրբեջանի սահմանին «հանգիստ իրավիճակի» մասին։ Մարտի 18-ին վարչապետի աշխատակազմը հայտարարել էր, որ Ադրբեջանը հայկական կողմին չի փոխանցել հրադադարի խախտման ապացույցներ և շեշտել, որ ՀՀ բանակը հրադադարի խախտման պատճառ կամ հրահանգ չունի։
