Չնայած Թուրքիայի հետ հարաբերություններն առանց նախապայմանների կարգավորելու մեր մոտեցմանը՝ թուրք հասարակության հետ ճշմարտության մասին խոսելու կարիք կա, Ծիծեռնակաբերդի հուշահամալիրում լրագրողներին հայտնել է «Ուժեղ Հայաստան» կուսակցության քաղխորհրդի անդամ Նարեկ Կարապետյանը։
Նրա խոսքով՝ տարածաշրջանային կայունությունն ավելի հաստատուն կլինի, եթե Թուրքիայի իշխանությունները ճանաչեն Հայոց ցեղասպանությունը։
«Եթե մեկը քեզ ստիպում է քո ազգի նշանակալի մասի ճակատագիրը մոռանալ սպանդից հետո, ապա դու ընդունում ես, որ քեզ հետ այդպես կարելի է, որ քեզ հետ այդ մեթոդներով են շփվում։ Մեր նախնիները բռնի տեղահանվել են այստեղ, նրանց մեծ մասը, նրանց հարազատների մեծ մասն սպանվել է ճանապարհին՝ սա ճշմարտությունն է։ Եթե մենք հիմա մոռանում ենք դա, դուռ ենք բացում դեպի ապագա և ասում, որ մեզ հետ կարելի է այդպես վարվել»,- ասել է նա։
Կարապետյանը պարզաբանել է, որ տարածաշրջանում ՀՀ-ն պետք է ունենա լավ հարաբերություններ, սակայն այդ հարաբերությունները չպետք է լինեն արյան վրա, այլ արդարության հիմքերի։
«Մեր երկրի առաջ երկու այլընտրանք է, առաջինը՝ ինչպես առաջարկում է այս իշխանությունը, մոռանալն է մեր պատմությունը և 1,5 միլիոն անմեղ սպանված հայերի ճակատագիրը: Իրենք առաջարկում են մեր ամբողջ պատմությունը մոռանանք՝ փոխարենն առաջարկում են Թուրքիայից էժան լոլիկ բերել, այս դեպքում ո՞րն է մեր գնահատանքը մեր հանդեպ, որպես ազգ մեր ազգային ինքնասիրության հանդեպ: Մեր պահանջը Ցեղասպանության ճանաչումն է, Ամերիկայի Միացյալ Նահանգները և Ֆրանսիան ճանաչել են, սադրա՞նք է դա, իհարկե ոչ»,- նշել է նա։
Մեկնաբանելով ընդդիմության հասցեին հնչող Արցախի հարցում հստակ տեսլականի բացակայության վերաբերյալ քննադատությունը՝ Կարապետյանը նշել է, որ վերջին տարիներին արցախահայերի կարգավիճակի քննարկումը փաստացի հանգել է նրանց վերադարձի իրավունքի հարցին։ Հիմնական խնդիրը մնում է այդ իրավունքի պաշտպանությունը, հավելել է նա։
Միևնույն ժամանակ՝ Կարապետյանը շեշտել է, որ երկարաժամկետ հեռանկարում Հայաստանը պետք է դառնա ուժեղ պետություն, որն ունակ կլինի հանդես գալ որպես տարածաշրջանային նշանակալի գործոն։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 111-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 111 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Ստամբուլի իշխանությունները ինչպես հաճախ, այս տարի ևս մերժել էին Հայոց ցեղասպանության զոհերի հիշատակին նվիրված միջոցառման անցկացման թույլտվությունը:
Կարդացեք նաև`
Ականատեսների հուշեր և փաստեր. Հայոց ցեղասպանության մասին գրքերի ընտրանի
Ուրուգվայից մինչև ԱՄՆ. Հայոց ցեղասպանության ճանաչման ուղին
