ԲԴԽ նախկին նախագահ Ռուբեն Վարդազարյանի վերսկսված քրեական գործով այսօր՝ մայիսի 15-ին, ԱԺ երկու պատգամավորի դատարան հրավիրելու և հարցաքննելու միջնորդություն է ներկայացվելու, գրել է «Ժողովուրդ»-ը։
Թերթը չի նշել, թե ովքեր են այդ պատգամավորները, սակայն պարզաբանել է, որ ԱԺ նիստերից մեկի ժամանակ նրանք Վարդազարյանին տվել են այնպիսի հարցեր, որոնք խիստ կասկածի տեղիք են տվել։
Ըստ լրատվականի՝ միջնորդություն է ներկայացվելու նաև ԲԴԽ նախկին նախագահ Գագիկ Ջհանգիրյանին հարցաքննելու համար։
Վարդազարյանը մեղադրվում է արդարադատության իրականացմանը խոչընդոտելու համար: Ըստ մեղադրանքի՝ 2019 թվականի հուլիսի 19-ից զբաղեցնելով ԲԴԽ նախագահի պաշտոնը՝ նա միջամտել է Լոռու մարզի ընդհանուր իրավասության դատարանի դատավոր Անդրանիկ Սիմոնյանի կողմից արդարադատության իրականացմանը:
