Հայաստանում 2025-ի առաջին 3 ամիսներին՝ հունվարի 1-ից մինչև մարտի 31-ը, մարմնական վնասվածքի և մահվան ելքով 989 ճանապարհատրանսպորտային վթար է գրանցվել, ինչի հետևանքով զոհվել է 61 մարդ, Armenia Today-ի հարցմանն ի պատասխան՝ հայտնել են ՆԳՆ ոստիկանության պարեկային ծառայությունից։
Ընդ որում՝ 2025-ի առաջին երեք ամիսներին ՃՏՊ-ներից վիրավորվել է 1403 մարդ։
Պարեկային ծառայության տրամադրած տվյալների համաձայն՝ 2024-ին Հայաստանում ճանապարհատրանսպորտային վթարներից 333 մարդ է զոհվել։
«2024-ին ՀՀ-ում մարմնական վնասվածքի և մահվան ելքով արձանագրվել է 4314 ՃՏՊ, ինչի հետևանքով զոհվել է 333 մարդ, վիրավորվել՝ 6116-ը։ 2023 թվականին ՀՀ-ում մարմնական վնասվածքի և մահվան ելքով արձանագրվել է 4613 ՃՏՊ, ինչի հետևանքով զոհվել է 378 մարդ, վիրավորվել՝ 6537-ը»,- հավելել են ՆԳՆ-ից։
Ծառայությունից տեղեկացրել են, որ 2024-ին 2023-ի համեմատ ՃՏՊ-ները նվազել են 229 դեպքով, զոհերը՝ 45-ով, իսկ վիրավորները՝ 421-ով։
