ՀՀ Քննչական կոմիտեն քրեական վարույթ է հարուցել մարտի 31-ին ադրբեջանական զինուժի կողմից կրակոցներից հետո, Armenia Today-ին հայտնել է ՔԿ մամուլի խոսնակ Կիմա Ավդալյանը։
Նրա խոսքով՝ գործը հարուցվել է Քրեական օրենսգրքի 44-155-րդ 2-րդ մասի 7-րդ և 15-րդ կետերով (ռասայական կամ ազգային հողի վրա ատելության դրդապատճառով սպանության փորձ, առավելագույն պատիժը՝ ցմահ ազատազրկում), 335-րդ հոդվածի 1-ին մասով (ապօրինի զենք-զինամթերք պահելը, առավելագույն պատիժը՝ 5 տարվա ազատազրկում)։
Ավդալյանը մանրամասնել է, որ նշանակվել են դատաձգաբանական և դատաապրանքագիտական փորձաքննություններ:
Ադրբեջանը մարտի 16-ից պարբերաբար հայտնում է Հայաստանի հետ սահմանին իր դիրքերի ուղղությամբ կրակոցների մասին, որոնք ՀՀ ՊՆ-ն հերքում է։
Մարտի 18-ին վարչապետի աշխատակազմը հայտարարել էր, որ Ադրբեջանը հայկական կողմին չի փոխանցել հրադադարի խախտման ապացույցներ և շեշտել, որ ՀՀ բանակը հրադադարի խախտման պատճառ կամ հրահանգ չունի։ Ադրբեջանի ԱԳՆ-ն քննադատել էր վարչապետի աշխատակազմի հայտարարությունը և կրկնել Հայաստանի կողմից կրակոցների մասին կեղծ պնդումները։
Մարտի 25-ին ՊՆ-ն հաղորդագրություն էր տարածել ու նշել, որ Հայաստան-Ադրբեջան սահմանագծի երկայնքով երբեմն արձանագրվում են կրակոցներ, որոնք չեն թիրախավորում ՀՀ տարածքը։ Մարտի 31-ին Ադրբեջանի ԶՈւ-ն կրակ էր բացել Սյունիքի մարզի Խնածախ բնակավայրի ուղղությամբ, ինչի հետևանքով վնասվել էր բնակելի տուն։
