ՀՀ ֆինանսների նախարարության մուտքի դռան դիմաց խուլիգանություն կատարելու դեպքի առնչությամբ քրեական վարույթ է նախաձեռնվել, Armenia Today-ին հայտնել է Քննչական կոմիտեի խոսնակ Կիմա Ավդալյանն՝ անդրադառնալով մարտի 31-ին տեղի ունեցած միջադեպին, երբ, ըստ ՆԳՆ-ի, քաղաքացին հրել էր ֆիննախի շենքի դուռն ու պահանջել բացել այն։
ՔԿ խոսնակը նշել է, որ անձը նախարարության մուտքի դռան դիմաց խուլիգանություն է կատարել, որպես խափանման միջոց նրա նկատմամբ կիրառվել է բացակայելու արգելքը:
«Անձի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 1-ին մասով (խուլիգանություն, առավելագույն պատիժն ազատազրկում՝ 2 տարի ժամկետով-խմբ․)»,- հայտնել է խոսնակը։
Armenia Today-ին ՆԳՆ-ից հայտնել էին, որ քաղաքացին «անհարգալից վերաբերմունք էր դրսևորել հասարակության նկատմամբ և խոչընդոտել էր ոստիկանության բնականոն ծառայությունը»։ Shamshyan.com-ի տեղեկություններով՝ քաղաքացին Արարատի մարզի բնակիչ, 25-ամյա Արման Ե․-ն է։
