Մարտի 31-ին՝ ժամը 21։00-ի սահմաններում, ՀՀ ֆինանսների նախարարության շենքի դռանն է մոտեցել քաղաքացի, հրել է այն և պահանջել, որ դուռը բացեն, Armenia Today-ին հայտնել են ՀՀ ՆԳՆ ոստիկանության հասարակայնության հետ կապի և լրատվության վարչությունից։
ՆԳՆ-ից հավելել են, որ նա «անհարգալից վերաբերմունք է դրսևորել հասարակության նկատմամբ և խոչընդոտել է ոստիկանության բնականոն ծառայությունը»։
«Անձը ձերբակալվել է խուլիգանություն կատարելու անմիջականորեն ծագած հիմնավոր կասկածի առկայությամբ։ Նա տեղափոխվել է բաժին։ Կազմված փաստաթղթերը փոխանցվել են Քննչական կոմիտե»,- տեղեկացրել են ՆԳՆ-ից։
ՔԿ-ից Armenia Today-ին հայտնեցին, որ դեպքի վերաբերյալ ավելի ուշ տեղեկություն կտրամադրեն։
Shamshyan.com-ի տեղեկություններով՝ քաղաքացին Արարատի մարզի բնակիչ, 25-ամյա Արման Ե․-ն է։
