Գյումրու ՏԻՄ ընտրություններին մասնակցած «Կոմունիստական կուսակցության» քաղաքապետի թեկնածու Վարդան Ղուկասյանին վերագրվող ձայնագրության առնչությամբ քրեական վարույթ է նախաձեռնվել, 1Lurer.am-ին հայտնել են ՀՀ գլխավոր դատախազությունից:
ՔԿ-ում քրեական վարույթ է նախաձեռնվել Քրեական օրենսգրքի 236-րդ հոդվածի 2-րդ մասով (Հավաք անցկացնելուն կամ դրան մասնակցելուն խոչընդոտելը կամ հարկադրելը, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը, առավելագույն պատիժը՝ 3 տարվա ազատազրկում):
Համացանցում տարածվել էր Ղուկասյանի ենթադրյալ մասնակցությամբ խոսակցության ձայնագրություն, որում նա սպառնում է և պահանջում կանչել մի շարք մարդկանց՝ նշելով, որ վերջիններս խնդիրներ են ունենալու:
«Անկախ դիտորդը» հայտարարություն էր տարածել՝ նշելով, որ հանցագործության մասին հաղորդում է ներկայացնելու Դատախազություն՝ պահանջելով քննել Ղուկասյանի ենթադրյալ մասնակցությամբ ձայնագրությունը:
Գյումրիում մարտի 30-ին կայացել էին ավագանու արտահերթ ընտրություններ։ Դրանց արդյունքներով՝ ՔՊ-ն և ՔՊ-ի քաղաքապետի թեկնածու Սարիկ Մինասյանը հավաքել էին 17 183 ձայն՝ չստանալով բացարձակ մեծամասնություն, ինչը հնարավորություն կտար քաղաքապետ դառնալ։ Երկրորդ տեղում «Հայաստանի կոմունիստական կուսակցության» թեկնածու, Գյումրիի նախկին քաղաքապետ Վարդան Ղուկասյանն է՝ 9727 ձայնով։ Երրորդ տեղում «Մեր քաղաքը» դաշինքն է և նրա թեկնածու Գրիգորյանը՝ 7380 ձայնով, չորրորդում՝ Ռուբեն Մխիթարյանն ու «Իմ հզոր համայնքը»՝ 3734 ձայնով։ Առաջատարների հնգյակը 2902 ձայնով եզրափակում է «Մայր Հայաստան» դաշինքը, որի ցուցակը գլխավորում է Կարեն Սիմոնյանը։
Մարտի 27-ին «Մայր Հայաստան» և «Մեր քաղաքը» դաշինքների ներկայացուցիչները հայտնել էին նախընտրական շտաբերում և իրենց անդամների, համակիրների բնակարաններում իրականացվող խուզարկությունների և քննչական գործողությունների մասին։ Նույն օրը Գյումրիում ընտրակաշառք տալու, ստանալու, ընտրության ժամանակ բարեգործության արգելքը խախտելու մեղադրանքներով «Մայր Հայաստան» և «Մեր քաղաքը» դաշինքներից 8 անձ էր ձերբակալվել, որոնցից 5-ի նկատմամբ մարտի 28-ին վարչական հսկողություն էր կիրառվել։
