Փաստաբան Տիգրան Հայրապետյանն ահազանգել է խուզարկությունների, ձերբակալությունների և փաստաբանների աշխատանքը խոչընդոտելու մասին։
Հայրապետյանն Armenia Today-ին հայտնել է, որ առավոտյան ժամը 7։00-ից խուզարկություններ են իրականացվում։ Նրա խոսքով՝ 8 ձերբակալված կա, որոնք, նախնական տեղեկություններով ու, հավանաբար, «Ուժեղ Հայաստան» դաշինքի համակիրներ են։
Նա նշել է, որ նրանց բերել են Հակակոռուպցիոն կոմիտե, որտեղ առանց փաստաբանների քննչական գործողություններ և հարցաքննություններ են իրականացվում, ինչի վերաբերյալ հանցագործության մասին հաղորդում են ներկայացրել ոստիկանություն։
«Արդեն 1 ժամ 15 րոպե է՝ փորձում ենք իրականացնել նրանց պաշտպանությունը, բայց թույլ չեն տալիս։ Առանց պաշտպանի հարցաքննությունն առնվազն հոգեբանական ճնշում ու հոգեբանական բռնություն է»,- հայտարարել է փաստաբանը։
Հայրապետյանը նշել է, որ նախկինում ՀԿԿ-ի մոտ հեռախոս կար, կողքին՝ համապատասխան պաշտոնյաների համարներ։ Նա տեղեկացրել է, որ այդ ամենը հիմա չկա, և փաստաբանները նույնիսկ դիմում ներկայացնելու հնարավորություն չունեն։
«Ասում են՝ դիմում գրեք ու գցեք արկղի մեջ, որը չգիտենք, տարին մեկ բացվո՞ւմ է, թե՞ ոչ կամ քանի՞ ժամից պետք է բացվի»,- ընդգծել է նա։
Փաստաբանը նշել է, որ դրանից հետո զանգահարել են Մարդու իրավունքների պաշտպանի գրասենյակ, որտեղից, իր խոսքով, ավելի շատ թղթեր են ուզել, քան քննչական մարմինները։
«ՄԻՊ-ից ասել են՝ մինչև չտեղեկանանք, որ հարազատի կողմից դիմում և փաստաբանի արտոնագիր ունես, չենք կարող օգնել։ ՄԻՊ-ն այսօր, իրականում, քննչական մարմիններին կից կառույց է։ Նախկինում չի արձանագրվել դեպք, երբ ՄԻՊ-ի թեժ գծին զանգեինք՝ ընթացք չտրվեր»,- ընդգծել է նա։
Մինչև այս պահը ՄԻՊ աշխատակազմից որևէ մեկը, փաստաբանի խոսքով, պաշտպանների աշխատանքը խոչընդոտելու հարցով օգնություն չի տրամադրել։ Հայրապետյանը հայտնել է, որ փաստաբանների աշխատանքը խոչընդոտելու հարցով հանցագործության մասին հաղորդման մասով ոստիկանությունից նույնպես դեռ արձագանք չկա։
«Ասացին՝ կգանք, բայց 40 րոպե է՝ ոչ մի արձագանք։ Ամենաթող ու անօրինական իրավիճակ է»,- շեշտել է նա։
Հայրապետյանն ավելի ուշ Armenia Today-ին հայտնել է, որ ժամը 13։47-ի դրությամբ նույն իրավիճակն է։ Նրա տեղեկություններով՝ ձերբակալվածները դեռ նույն կարգավիճակում են։
Փաստաբանները մինչև այս պահը, նրա փոխանցմամբ, չեն կարողացել տեսակցել պաշտպանյալներին ու մուտք գործել ՀԿԿ։ Հայրապետյանը տեղեկացրեց նաև, որ ծանոթ չեն մեղադրանքերին։ Նա հայտնեց, որ իրավապահները հանրային պաշտպաններ են փորձում ներգարվել այն դեպքում, երբ ձերբակալվածների հարազատները մասնավոր պաշտպանների են դիմել։
Նա նշել է, որ հանրային պաշտպանի գրասենյակի միջոցով փորձում են շարունակել խոչընդոտել իրենց աշխատանքը։
Ավելի ուշ Հակակոռուպցիոն կոմիտեից Armenia Today-ին հայտնել են, որ նրանց նկատմամբ քրեական հետապնդում է հարուցվել ենթադրյալ ընտրակաշառք տալու, ստանալու դեպքերի առթիվ, կատարվում են վարութային գործողություններ։ Այլ մանրամասներ ՀԿԿ-ից չեն հայտնել։
Մարտի 30-ից սկսած՝ իրավապահ մարմինները հրապարակում են հաղորդումներ, որոնցում դաշինքի ներկայացուցիչներին մեղադրում են բարեգործության, կաշառք տալու և խոստանալու մասին օրենքը խախտելու մեջ:
Ձերբակալությունների նոր ալիքն սկսվել էր մայիսի 8-ին՝ Շիրակի մարզի Անի համայնքում և Մարալիկ քաղաքում կուսակցության գրասենյակների խուզարկություններից հետո:
Մայիսի 12-ին Հակակոռուպցիոն կոմիտեն հայտնել էր «Ուժեղ Հայաստան» դաշինքին վերաբերող գործում նոր մեղադրանքների մասին։ Մայիսի 13-ին ՀԿԿ-ն ենթադրյալ ընտրակաշառքի գործով նոր ձերբակալությունների մասին էր տեղեկացրել: «Ուժեղ Հայաստան»-ն այս գործողությունները քաղաքական հետապնդում է համարում և նշում, որ դաշինքը գործում է օրենքի շրջանակներում և բացառում է ընտրակաշառքի կիրառումը։
Կարդացեք նաև՝
«Ուժեղ Հայաստանին» առնչվող գործերի մեծ մասը դատարաններում չի ապացուցվում․ Կարապետյան
Թարմացված է՝ 27.05.2026 | 16։10
