Հունիսի 15-ին Հայաստանում ուժեղ քամու հետևանքով տուժածների թիվը հասել է 5-ի, հունիսի 14-15-ը Հայաստանում ուժեղ քամիների հետևանքով զոհեր չկան, տեղեկանում ենք ՆԳՆ փրկարար ծառայությունից։
Գերատեսչությունը մանրամասնել է, որ տուժածները հոսպիտալացվել են և ստացել անհրաժեշտ բուժօգնություն։
Ժամը 16։10-ից Ապարանում և Լուսագյուղ բնակավայրում ուժեղ քամու հետևանքով վնասվել էին շենք-շինությունների տանիքներ, ավտոմեքենաներ, տապալվել էին ծառեր ու էլեկտրասյուներ, ինչպես նաև արևային կայաններ ու ջրատաքացուցիչներ։
«Ապարանում վնասվել են 20 բազմաբնակարան շենքի, 86 առանձնատան, 3 դպրոցի, 1 մշակույթի տան, իրավապահ կառույցների 2 տարածքային ստորաբաժանման ու 24 կազմակերպության վարչական շենքերի տանիքներ։ Վնասվել է նաև 70 էլեկտրասյուն, 30 տրանսպորտային միջոց, 2 խաղահրապարակ։ Տապալվել է 100-ից ավել ծառ»,- Ապարանի համայնքապետրանից տեղեկացրել են ՆԳՆ-ին։
ՆԳՆ տվյալներով՝ հունիսի 14-ից 15-ը Տավուշի, Լոռու և Շիրակի մարզերում տեղացած կարկուտի հետևանքով վնասվել է 6 տրանպորտային միջոց։
Փրկարար ծառայությունը հունիսի 16-ին՝ ժամը 07։30-ին, վերսկսել է փրկարարական աշխատանքները, որին մասնակցում է 205 փրկարար։
Հունիսի 14-ին Երևանում և մարզերում ուժեղ քամու հետևանքով 38 արտակարգ դեպք էր գրանցվել։ Հունիսի 15-ին Ապարանում պտտահողմի հետևանքով մարմնական վնասվածք էր ստացել 4 մարդ, այդ թվում՝ 1 երեխա։
