Հայաստանի ֆինանսների նախարար Վահե Հովհաննիսյանը հնարավոր է համարել, որ ռիսկային սցենարի դեպքում Հայաստանի տնտեսական աճը 5,1%-ի փոխարեն կարող է լինել 1,3%։ Հովհաննիսյանը այդ մասին հայտարարել է մամուլի ասուլիսի ժամանակ, ուղիղ հեռարձակումը՝ Armenia Today-ի Youtube-ի ալիքում։
Նրա խոսքով, բյուջեն պլանավորելիս՝ կառավարությունում դիտարկում են սցենարներ՝ հաշվի առնելով ռիսկերը, դրանց ազդեցությունը։
Իսրայելի և Իրանի միջև սրացմանն անդրադրադառնալով՝ նախարարը նշել է, որ կան երևույթներ, որոնք կարող են բացասաբար, կան երևույթներ՝ դրական ազդել Հայաստանի վրա։
«Շատ բան կախված է այդ սրացման աստիճանից և դրա տևողությունից»,- ասել է Հովհաննիսյանը։
Անդրադառնալով ռուս-ուկրաինական հակամարտությանը՝ նախարարը նշել է, որ Հայաստանը դեռևս 2022 թվականին, հենվելով 2014 թվականի փորձի վրա, սկսել է միանգամից դիտարկել վատթարացման հնարավոր սցենարները։
«Բայց իրականում մենք դրական զարգացում ունեցանք։ Հիմա մենք չենք շտապում եզրակացություններ անել։ Մեր անելիքները մնում են նույնը։ Իհարկե, ես վստահ եմ, որ էկոնոմիկայի նախարարության մեր գործընկերները զբաղվում են մեր լոգիստիկ մատակարարումների հետ կապված հարցերով, որոնք անցնում են Իրանի տարածքով»,- նշել է ֆինանսների նախարարը։
Հովհաննիսյանի խոսքով, իրանա-իսրայելական հակամարտությունը կարող է բացասաբար անդրադառնալ մատակարարումների վրա, քանի որ հայկական տնտեսության լոգիստիկ շղթաների մի մասը կապված է Իրանի հետ: Նախարարը չի բացառել, որ մատակարարումները կարող են խաթարվել, հետաձգվել կամ թանկանալ։
«Եթե իրավիճակն այնքան սրվի, որ միջազգային ներդրողներն սկսեն Հայաստանին նույնպես ընկալել որպես ներդրումների համար ռիսկային երկիր, դա կարող է ազդել նաև տոկոսադրույքների վրա։ Ազդեցության բազմաթիվ գործոններ կան, բայց մենք պետք է հետևենք իրադարձությունների զարգացմանը և ընթացում հասկանանք, թե ինչ պետք է անենք՝ մեղմելու ազդեցությունները»,- հավելել է նա։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ Պաշտոնական Երևանը դատապարտել էր Իսրայելի հարձակումն Իրանի վրա։ Երկու կողմն էլ հայտնել է զոհերի և բազմաթիվ տուժածների մասին:
