Վարչապետ Նիկոլ Փաշինյանը՝ ելույթ ունենալով ԵԱՏՄ միջկառավարական խորհրդի նիստում, միության երկրների միջև ապրանքաշրջանառության աճը տարածաշրջանի սակավաթիվ դրական երևույթներից է համարել։
«Պետք է ընդգծեմ, որ չնայած բոլոր մարտահրավերներին, միջազգային դժվար իրավիճակին` ԵԱՏՄ-ն լավ զարգանում է: Պետք է նկատեմ, որ ԵԱՏՄ-ի շրջանակում առևտրաշրջանառությունը կայուն տեմպերով աճում է, և սա մեր տարածաշրջանային գործերի սակավաթիվ դրական երևույթներից մեկն է»,- ասել է Փաշինյանը։
Նա հավելել է, որ այժմ աշխատանքներ են տարվում Ռուսաստանի կողմից ԵԱՏՄ զարգացման ռազմավարության նախագծի վրա մինչև 2025 թվականը։ Նա մատնանշել է փաստաթղթի դրույթների լրացուցիչ մշակման անհրաժեշտությունը հետագա տնտեսական ինտեգրման ուղղությամբ։
«Իրապես՝ տնտեսությունը շատ կարևոր է, և մենք այժմ կենտրոնացած ենք ԵԱՏՄ զարգացման մինչև 2025թ․ ռազմավարության իրականացման վրա: Այժմ աշխատում ենք նախագծի` Սանկտ Պետերբուրգի հռչակագրի վրա, որը ներկայացվել է ՌԴ կողմից: Իհարկե, շատ հետաքրքիր նախագիծ է, և շատ կետեր, ընդհանուր առմամբ, ընդունելի են:
Նախագծի շուրջ առկա է դրական մթնոլորտ, բայց կան նաև բազմաթիվ նրբություններ, որոնք լրացուցիչ պետք է քննարկվեն: Ինչո՞ւմ է գլխավոր հարցը. կան հետագա ինտեգրացիայի շուրջ որոշ կետեր, որոնց վերաբերյալ անդամ պետությունների դիրքորոշումները որոշակիորեն տարբերվում են, բայց կարծում եմ` կա հնարավորություն գտնելու կոնկրետ լուծումներ, մեր բոլոր գործընկերները տրամադրված են շատ դրական»,- ասել է Փաշինյանը։
Հայաստանի վարչապետը նաև մատնանշել է գազի և էներգետիկայի միասնական շուկայի ստեղծման և Միության երկրների կառավարությունների վարկային ու ֆինանսական քաղաքականության համակարգման կարևորությունը։
Ավելի վաղ՝ ԵԱՏՄ նիստի շրջանակներում, ՌԴ վարչապետ Միխայիլ Միշուստինը հայտարարել էր, որ Անդրկովկասում տրանսպորտային հաղորդակցությունների ապաշրջափակումը կապահովի տարածաշրջանի կայուն զարգացումը։
